No.865/2020-2021
Dated Serchhip, the 6th May, 2020: Dr. C. Zarzokima, District A.H. & Vety Officer, Serchhip District chuan tunlaia vawk pul hri leng hlauhawm tak African Swine Fever (ASF) laka kan him theih nan a hnuai ami ang hian mipuite hriat tur pawimawh chhuah:
Tunlai hian Assam leh Arunachal Pradesh ah te vawk pul hri hlauhawm tak African Swine Fever (ASF) nia rinhlelh a leng mek a. Assam ah ringawt pawh vawk sanghnih chuang an thi tawh a ni. He pul hri hi inkaichhawn awlsam tak a nih avangin a len tawhnaa tih theih awmchhun chu vawk awm zawng zawng suat mang vek a ni a. Chuvangin, he hri hian Mizoram a rawn luh lohna tur leh Serchhip District chhunga kan vawk ten an kai lohna turin lo inven lawk a pawimawh a. A hnuaia point hrang hrang te hi vawk vulhtu te leh mipui mimir pawhin kan hriat a, hma kan lak nghal a tul a ni.
1. Ram pawn leh District pawn atanga vawk leh vawk atanga thil siam reng reng lak luh loh tur a ni a. Chuvangin, Serchhip Bawrhsap in vawk lakluh khapna thupek (vide No. J. 12017/2/2017-DC (SRCP)/330 Dt. 15/4/20) a chhuah hi khauh taka kenkawh a tul a. Chutiang tur chuan khaw tina VC te, NGO te leh Village Level Task Force te pawhin hma an lak a pawimawh em em a ni.
2. Hri vei nia rinhlelh vawk damlo leh thi an awm chuan Vety Doctor te leh Field Staff te hnenah report vat thin tur a ni.
3. Vawk thi reng reng paih mai lovin thuk takah chinai/disinfectant te nen phum tur a ni.
4. Vawk damlo reng reng hralh/talh/ei tura sawngbawl loh tur a ni.
5. Vawk in leh vulhna hmunte damdawi hmanga vawn thianghlim tur a ni a. Midang tlawh pawh tir lovin, vawk vulhna hmun dang nen inkal pawh loh tur a ni.
6. Vawk chaw atan chaw nawi khawn khawm hi natna hrik kai theihna a nih avangin tih loh tur a ni a, loh theih loh a nih erawh chuan uluk taka chhuan so thin tur a ni.
7. Vawk talhna leh puahna ningnawi te felfai taka phum bo tur a ni.
Heng point hrang hrang te hi mahni theihna zawn theuhah puangzara hma la turin AH & Vety Department, Serchhip chuan min ngen a ni.
