No.5142/2020-2021
Kolasib 16th September 2020: Vawiin khan Dr Engkunga Chhangte, District Veterinary Officer, Kolasib District chuan thutharlakhawmtute kawmin, kum 2019-20 chhunga Animal Husbandry & Veterinary Department, Kolasib District hmalakna hrang hrang sawihona hun a neihpui a, Covid-19 hrileng kar a mipuiten ran vulhna lam a harsatna an tawh lohna tur a hmalakna thenkhat a tarlang bawk a ni.
Dr Engkunga chuan Kolasibah District Veterinary Hospital changtlung tak sak mek a nih thu sawiin Vawk chi lak khawlna ‘Semen Collection Centre’ pawh ruahman a nih thu a sawi a, “ Tun hnai atang hian Kolasib district-ah Artificial Insemination/ Vawk kah rai hi thla tinin tum 130 vel neih ziah a ni,” a ti a,” Vawkpui awmzat leh Vawk kah rai kalpui dan atanga chhutin Kolasib district-ah hi chuan Vawk noteah kan intodelh thuai kan beisei,” a ti. April leh August 2020 inkarah Artui, Ar, Ar note leh a chaw hralhna atangin Rs. 12,57,765 hmuh a nih thu tarlangin,” Heihi AH&Vety department hmalakna avang leh Covid-19 hrileng avanga mipuiah Arsaa intodelh duhnaa pung niah kan ngai a, a lawmawm hle a ni,” a ti.
DVO chuan FOCUS kaltlanga hmalakna thenkhat tarlangin Kolasib District hnuai a Village Council 13 ah hamthatna dawng mi 390 an awm thu a sawi a, “Arte 7,800 semchhuah a ni tawh a, sem chhunzawm zel a bawk a ni,” a ti. Thingdawl Poultry Demonstration Farm, Piggery Demostration Farm leh Calf Rearing Farm a ran vulh dan te enin hmachhawp hrang hrangte a sawipui bawk a ni.
Kum 2019-2020 chhung khan AH& Vety, Kolasibah hian ran dam lo 59,901 enkawl a ni a, vaccine hrang hrang a hnuai ami ang hian pekchhuah a ni bawk;
i) S.F. Vaccine ( Vawk pul venna) - 4617
ii) FMD vaccine (Bawng ke leh ka na venna) - 8208
iii) Rabies Vaccine (Ui a hri venna) - 1276
iv) Goat Pox & PPR vaccine (Kel natna venna) - 617
State dang atanga ran phurh luh turte Inter-State Animal Check Post, Vairengte-ah enfiah thin a ni a, Kum 2019-2020 chhunga ran leh ar enfiah zat chu 13,22,112 a ni.
Kum 2019 - 2020 chhunga ran kahrai zat hetiang hi a ni:
Bawng - 719
Vawk - 1041
Pig A. I. Centre, Kolasib Project Veng ami chu tilian tura hmalak mek a ni a, National Artificial Insemination Programme (NAIP) hnuaiah ran kah rai hi report pek zel a ni.
AH& Vety Department farms - Ran vulhtute hnena ran vulh dan dik zirtir nan leh ran atanga tharchhuah tihpun nan Thingdawl A.H & Vety Farm Complex-ah heng farm-te hi kalpui mek a ni;
a) Poultry Demonstration Farm-
Layer - 185 leh Ar note - 2200 a awm mek a, Kum 2019-2020 chhungin artui leh ar hralhna atanga Rs 4,36,705 hmuh a ni a, April - August 2020 chhungin artui, ar, ar note leh ar chaw hralhna atangin Rs 12,57,765 hmuh tawh a ni.
b) Piggery Demonstration Farm
He demonstration farm hi 13. 3. 2018-a din tan a ni a, tunah hian Vawk 25 a awm mek a ni. Vawk leh Vawk note hralhna Rs 7,86,850 hmuh chhuah tawh a ni. April - August, 2020 chhungin Vawk, Vawk note leh Vawk chaw hralhna atangin Rs 2,54,000 hmuh tawh a ni.
c) Calf Rearing Farm-
Kum 2012-a din a ni a, bawng 19 a awm mek a ni. 64 hralh chhuah tawh a ni a Bawng harlhna atanga hmuh tawh zat - Rs 18,34,000 a ni.
