Vawiin khan Kolasib District huam chhunga Village Council Inthlanna (By election) khaw paruk - N. Chawnpui, N. Hlimen, Phainuam, Saihapui V, Saipum leh Saiphai ah te tluang takin mipuiin vote an thlak a. Buaina leh boruak duhawmlo engmah thleng report dawn a awm lo.

Kolasib District VC By Election atana State Election Commission (SEC) in Election Observer atana a ruat Pu Lalhmachhuana, Secretary, ICT Department chuan tukin zing atang khan N.Chawnpui, Saiphai leh Saipum te tlawhin inthlanna chu boruak muanawm hnuaiah felfai leh thianghlim taka neih a ni thei chu lawmawm a tih thu a sawi.

Kolasib DC, Election Branch atanga report dawn danin vawiin chawhnu dar 2 thleng khan vote tla zat chu za zelah 45.88 a ni. Vote tla te hi vote thlak theih hun a tawp hnuin chhiar nghal tura ruahman a ni.