No.4519/2020-2021

Mizoram State Election Commission (SEC) in Village Council leh Local Council inthlan nimin-a a buatsaih-ah Hnahthial District chhungah Village Council 30-ah inthlan hi buatsaih a ni a, a hma in Hnahthial South-III leh New Kawnpuiah te chuhtu awm lovin an tling tawh a, Hnahthial District-ah hian voters sing hnih zaruk leh sawm pali (20,614)-ah vote thlak sing khat sang ruk leh sawmsarih pathum (16,073) a tla a, chu chu 77.97% a ni.

Khaw 30-ah hian khaw 21-ah MNF party-in majority neiin, INC in khaw 8-ah, ZPM leh Independent Candidate te khaw khat ve veah an ni thung.

Hnahthial District Bawrhsap leh District Election Officer ni bawk Pu Vanlalmawia chuan District tharah Election Commission in thlang turah min tih angin a vawi khatna atan Village Council inthlan kan hmachhawn a, tluang taka kan nei zo thei hi a lawmawm hle a ni, inthlanna hlawhtling tak kan neih theihna atana thawktu DC office-a officer leh staff te, venhimna lam buaipuitu SP leh a thawhpui te, Magistrate Section Officer, Returning Officer te, Polling leh Counting official te, Medical Duty te, mamawh leh tul em em buaipuitu PHED leh P&E department chungah te leh Party hrang hrangte thawhpuinaah te, Village Level Task Force leh khawtlang hruaitu leh tlawmngai pawl zawng zawngte chungah thinlung takin lawmthu a sawi a, Model Code of Conduct bawhchhiatna a awm lo ni a hriat avangin lawmthu a sawi bawk.