No.5196/2020-2021

Dated Serchhip, the 18th September, 2020: Vawiin hian Serchhip DC Meeting Hall ah tun hnaia Village Council thlan tharten Foundation Training, SIRD & PR kaltlanga an neih theih dan tur ngaihtuahin District Task Force of Covid19 chu an Chairman Pu Kumar Abhishek, IAS hovin an thukhawm.

Pu Kumar Abhishek chuan, hripuiin min chim mek mah se sawrkar hnate chu tha taka kalpui zel a ngai a, a bikin tun hnaia thlan thar VC members te chu 15th Finance Commission atanga an sum dawn tur an hman dan turte, ni za inhlawhna an kalpui zel dan turte, village level task force on covid19 an kalpui dan turte leh an awm dan tur sawrkar dan hrang hrang te rang taka an zira hnathawk theia buatsaih thuai an tul a. Chutihlaiin hripui inkaichhawn theihna laka fihlim chunga training tir dan zawn a tul bawk a, chung thilte chu uluk taka kan ngaihtuah tlan a ngai a ni tiin members te a chah a ni.

He hunah hian Serchhip SIRD & PR, District Panchayati Resource Centre Head Faculty Pu Vanlalhruaia chuan Village Council member thlan tharte tana Foundation Training Course mumal taka kalpui a tul chhan leh training dan tur ruahmanna an siam chinte sawifiahna a nei hmasaa, chumi hnuah committee hian Covid19 hripui laka himna dante zawm chunga training kalpui a nih theih dan tur nia an ngaihte, a hun leh a hmun turte sawi hona an nei zui a ni.

Committee chuan, Training chu sawrkarin phun khawm a phal sak zat chin pel lo leh inhlata awm tura phal chin (social distancing) dante zawm chunga October thla chhova a indawta neih dan tur duan ni se tha a ti a. Head Faculty Pu Vanlalhruaia chu a chipchiara lo duang tur leh a ruahmanna te chu DC leh Medical lamte nena la thlir ho leh nise tiin thu a dah a ni. Tin, training hi Serchhipah leh E. Lungdarah te buatsaih nise tiin an rel bawk.

Hei bakah hian Covid Care Centre, Nursing School a tui supply chungchang leh mipuiten hmaituamna an hman that leh that loh chungchang thlirletna te leh thil pawimawh dangte pawh sawi a ni.

Meeting ah hian Pu R. Sathyiasundaram, IPS, SP, Pu Lalmuansanga Ralte, Addl. DC leh members dangte an tel a ni.