2103/2022-2023

Aizawl 28th September 2022: Aizawl Deputy Commissioner leh Chairman, District Task Group on Myanmar Refugees ni bawk, Dr. Lalhriatzuali Ralte chuan a hnuai a mi ang hian thu a chhuah.

Myanmar tualchhung buaina avanga Mizorama rawn raltlante tana inkaihhruaina leh hriattirna, Deputy Commissioner, Aizawl District-in a chhuah tawhte chu tha zawka zawm turin kan inhriattir a. A hnuaia tarlan te hi Khua leh Veng tina Myanmar raltlan awm ten an zawm ngei ngei turin kan han inhriattir nawn leh a ni. Heng thuchhuahte hi tha taka zawm a nih theih nan Veng/Khaw tina Local/ Village Level Task Group on Myanmar Refugees-te leh Veng/Khawchhung NGO-te hma la tura ngen leh hriattir kan ni e.

1. Khua/Veng chhunga Myanmar raltlan rawn lut thar te chu Local/ Village Level Task Group on Myanmar Refugees te hnenah an in report tur a ni a. Task Group te hian format duansa hmangin profiling an ti ang a, a bialtu Zonal Officer-in hearing a neih zawh hnuah Deputy Commissioner's Office, Aizawlah identity Card siam tur a ni.

2. Aizawl District chhunga Relief Camp-a awm tur reng rengin Deputy Commissioner, Aizawl emaw a aiawh hnen atangin phalna an nei hmasa tur a ni.

3. Myanmar Raltlan-te Dan phal loh sumdawnna kalpui leh Mizoram State chhung Dan leh Hrai leh Khawtlang Dante kalh zawngin an khawsa emaw an awm tur a ni lo. Tin, India ram Dan leh Hrai te an zawm tur a ni a, an palzut tur a ni lo.

4. Myanmar raltlan-te'n anmahni duhthu thuin Dawr hawn/Sumdawnna an kalpui tur a ni lo; Ram Dan dinglai zawm theuh tur a ni.

5. Myanmar raltlan tupawh hmun danga insawn tur emaw eizawnna avanga awmhmun sawn leh awm bo ngai reng reng te chu Relief Camp in-charge (Relief Camp chhunga awm te tan) emaw an awmna Veng/Khua theuh Local/Village Level Task Group on Myanmar Refugees hnenah an in report ang a, anni hian DC's Office, Aizawlah an report anga Deputy Commissioner emaw a aiawhin phalna / Movement permit a pe thei ang.

6. Khawdang/Ram danga zin chhuak turte chuan Deputy Commissioner emaw a aiawh emaw Local/ Village Task Group on Myanmar Refugees emaw Camp In-charge emaw hnen atangin Movement Permit an nei tur a ni.

7. Myanmar tualchhung buaina avanga Mizoram chhunga raltlana awm mek te'n Ram Dan dinglai 'the Mizoram Land Revenue Act, 2013' angin Ram leh In hmun lei leh neitu nihna an nei thei lo a ni. Ram leh In hmun neitute pawhin Dan bawhchhiain Ram leh In hmun te hralh leh hlanchhawn tur a ni lo.

8. Myanmar atanga raltlan te zingah lirthei rawn luhpui an awmin mumal takin Local/Village Level Task Group on Myanmar Refugees te hnenah an hriattir thin tur a ni.

9. Myanmar tualchhung buaina avanga Mizorama awm mek te zingah; Dan ang thlapa India/ Mizoram rawn lut, Dan hnuai lirthei khalh phalna International Driving Permit (IDP)/License neite chauh lo chuan Lirthei engchi mah an khalh phal a ni lo.

10. Myanmar khua leh tui Mizoram chhunga raltlan a awm mek te'n dan lovin Aadhar Card/Voters-ID/Driving License leh a dangte an siam tir tur a ni lo.

11. Heng inkaihhruaina leh hriattirna hrang hrangte hi Myanmar khua leh tui Mizorama raltlan mek te chu zawm ngei tura hriattir leh ngen an ni, inkaihhruaina leh hriattirna zawm lo an awm a nih chuan a kaihhnawih Dan dinglai ang zelin hrem theih an ni ang.