No.1693/2021-2022

Aizawl, the 5th August 2021: Vawiin chawhnu khan Pu J.Hmingthanmawia Secretary, Agriculture Department chuan a office chamber, MINECO-ah tunlaia vawkhri leng mek endikna hmanrua (ASF/PRRS Rapid Test kits) FOCUS Project hnuaia lei te chu Animal Husbandry & Veterinary Department hotute hnenah a hlan.

Hmanraw inhlanna hunah hian thu sawiin Pu J.Hmingthanmawia chuan tunlai vawk hri leng mek ah hian vawk tam tak an thi tawh a, vawkvulhtuten Cheng tam tak an hloh mek tih a sawi a. A darh zel dan chhuina leh hriat chhuah thuai theihna turin Agriculture Department hnuaia FOCUS Project chuan Test kit leh hmanraw dang engemawzat a lei sak a. Heng hmanraw hmang hian hmun leh hmunah hri kai a hmuh chhuah zung zung theih dawn a, hri darh zel tur venna leh danna a tan a tangkai hle dawn a ni a ti.

Heng bungrua AH&Vety hnena hlan te hi ASF test kit 2000 leh PRRS test kits 400 a ni a. Heng bakah hian ELISA kit, Spectrophotometer, PPE leh Laboratory equipments leh chemical te an la pe bawk dawn a ni.

He hun hi Pu Rohmingthanga Coiney, Mission Director, FOCUS chuan a kaihruai a. Sawihawnna hun Pu R.K.Nithanga, State Project Director, FOCUS in a hmanga, Bungrua te hi AH&Vety aiawhin Dr.H.Laltlanmawia, Director, AH&Vety Department chuan a dawng a ni.