Vawiin khan Mizoram State Veterinary Council (MSVC) leh Indian Veterinary Association, Mizoram tangdun te huaihawt in 'World Veterinary Day' chu Tourist Lodge, Chaltlang ah Veterinarian-te leh ranvulh lama tui ten an hmang a. He hun hi AH &Vety Minister Pu C.Ngunlianchunga leh Secretary Pu C. Thatkunga ten an hmanpui a ni. World Veterinary Day lawmna inkhawm ah hian kal khawmte hnenah mithiam ten 'animal welfare' tih thupui hnuaiah zirtirna an pek bakah Veterinarian thawkthate hnenah chawimawina MSVC in hlan bawk a ni.

Vety Minister Pu C. Ngunlianchunga chuan hmasang ata tawh Mizo te hian ran kan ngainat thin thu leh eizawnna atan em hmanglo mah ila chhumlo chatlova ran vulh reng thin kan ni a ti a. Tunah erawh chuan eizawnna atan hial a hmang chhungkaw tam tak awm tawhin, NLUP trade hnuaiah pawh eizawnna pawimawh tak a ni tawh a ni a ti. Ran kan vulhna a rei tawh ang hu in remchang erawh tunhma aiin kan la hrezawk chuang lo hle a, ran mamawh viau si hian ranchungah ngilneihna lantirna kawngah te, ran hriselna buaipui thu hla ah te kan la vengva tawk lo hle a ni a ti a. Ran hrilselna atana hlauhawm lemlo ran in natna a vei chi hrang hrang te mihring tana thihna hial thlen thei tam tak a awm thu hrelo hian ran nen kan inchenpawlh nasa tawh si a. Hengah te hian kan than harh a hun tawh a, Vety department mithiam tamtak an awm mek te hi rawn na chang leh pan nachang kan hriat a pawimawh a ni a ti a.

Veterinarian-te pawh office a thu mai mai lova an vah chhuah tam a ngai a, ranvulhtu te pui turin tun aia nasa a ke an pen chhuah a ngai a ni a ti. Ran atanga hrileng leh mihring nunna tam tak suat thei thin te pawh ram leh mipui venghim tu sipai te anga thilhlauhawm hriat chhuah zung zung anga an tih tawp chu an mawh a nih thu a sawi a ni.

World Veterinary Day progrmme then khatna hi Dr. R.Kapthuama, President, MSVC in a kaihruai a, Chawhnu a Technical session programme chu Dr. Saingura Sailo, Registrar, MSVC in a kaihruai thung a ni. Resource person atan Dr. Engkunga Chhangte, Dr.Pachuau Lalmalsawma, Dr.T.K. Rajkhowa, Associate professor, CVSc&AH CAU, Selesih a mi leh Dr. Lallawmzuali Ralte te hman an ni a. An ni hian mihring hriselna leh ran hriselna inkaihhnawih dan te, tunhnai a ran natna vei atanga mihringte tana natna thar hlauhawm tak tak chungchangte leh inven dan te bakah veterinary science in mipui vantlang hriselna kawnga awmze pawimawh tak a neih dan chungchang ah te kalkhawm te hnenah zirtirna an pe a ni.