Vawiin chawhma dar 11:00 khan Vice Chairman, High Power Committee Office, Lunglei chu luah tan a ni a. Programme hi Pu R. Lalramnghaka, Add. D.C. in a kaihruai a ni.

Vice Chairman thar Pu Joseph Lalhimpuia’n thu sawiin Pathian malsawmna dawngin Pathian-in a hun ruatah office luah theia a awm chu lawmawm a tih thu a sawi a. He dinhmun a luah avanga lawmpuitu zawng zawng hnenah lawmthu a sawi bawk. A bikin Pu Lal Thanhawla, Mizoram Chief Minister chungah lawmthu sawiin, Lungleiin a bik taka a duhsakna an dawn avangin lawmawm a tih thu a sawi a. Kawmzawl-ah Thlawhna te chi a tum thuai tur thu te, PWD leh P & E ten Lunglei hmasawnna tur plan cheng vaibelchhe tam tak an siam atangte in Lunglei chuan hmelthar a hmuh thuai a beisei thu a sawi. Office reng reng hi amahni a kal thei lova, sorkar hnathawktu te, chanchinbu mite leh mipui tawiawmna tha a neih chauhin a kal theih dawn avangin mitinte tawiawmna a ngen. Mahni hun theuhah ram leh hnam tan theih tawp thawh a tum thu a sawi. Chief Minister in a duhsakna avangin MOS rank angin sum leh pai staff-te nen office luahin hnathawk thei in kan awm dawn a ni, a ti. High Power Committee hi Lunglei District tan hmasawnna kawng hnai tak a ni dawn a, hemi hmang hian hmasawnna hna kan thawk dawn a ni, a ti bawk.

Pi M. Zohmingthangi, IAS, Lunglei Bawrhsap pawhin thu sawiin, he High Power Committee Office hi tunhma zawng aiin thil ti thei takin a kal a beisei thu a sawi. Hna reng reng hi mahnia thawh theih a nilova, team work a nih avangin a te ber atanga a lian ber thlengin thawhho a ngai a ni, a ti. Vice Chairman High Power Committee lo ni tawh Pu Sapa leh Pu L.P. Thangzika te pawhin tunhma HPC office an kalpui dan sawina a nei bawk.