No.4219/2021-2022

Aizawl the 10th March, 2022: Mizoram Legislative Assembly pariatna Session vawi kua na chu vawiin hian a tiak dawn ta a. Mizorama cham mek Vice President Pu M. Venkaiah Naidu chuan chawhma session ah thu a sawi a. Governor Hari Babu Kambhampati pawh he hunah hian a tel a ni.

House Speaker Pu Lalrinliana Sailo chuan Vice-President lawmna thu a sawi hnu ah Pu Venkaiah Naidu chuan Assembly hmaah chuan thu a sawi a.

Vice President chuan Mizoram Legislative Assembly session a thu a sawi thei chu lawmawm tiin, kumin May thlaah Mizoram Legislative Assembly kum 50-na lawm a ni dawn tih a lo hriatpui thu leh a lawmpui thu a sawi a. India ramin zalenna a sual chhuah kum 75-na lawma Azadi ka Amrit Mahotsav a kalpui mek leh, Mizoram Legislative Assembly kum 50-na chuan India rama democracy ropuina leh hmasawnna a lantir thu a sawi. Vice President chuan Legislative Assembly chu mipui hmasawnna atan tha ber ngaihtuah a sawihona hmun tur a nih avangin tullo leh awmze neilo a inhnialbuaina emaw intihbuaina hmun tur a nih loh thu a sawi a. Hemi kawngah hian Mizoram Legislative Assembly chu entawntlak tak nia a hriat thu a sawi.

Vice President chuan Mizoram state inrelbawlnaah local/ village level inrelbawlna ngaihpawimawh a ni chu lawmawm a tih thu a sawi bawk a. Inthlan nikhuaah kohhran leh tlawmngai pawlte'n thahnemngai taka tawiawm a, inthlan muanawm tak a awm theih nan a chanvo pawimawh tak chelh thin chu fakawm a ti a. COVID-19 hrileng do kawnga sawrkar leh mipui tawngrual taka an thawhhona te chu fakawm a ti bawk.

Pu M. Venkaiah Naidu chuan Sustainable Development Goals (SDG) India Index 2021 a Mizoram chu kum 2019-20 a rank 21-na a nih atanga kum 2020-21 Index ah rank 12-naa a invawrh chho chu lawmawm a tih thu a sawi. Hmasawnna atana inkalpawhna (transport infrsastructure) tihhmasawn ngaihpawimawh a ni chu lawmawm a ti a. Kuthnathawktute tihmasawn leh chawisang tura Agriculture leh Horticulture kawnga state in hma a lakna te, Tourism leh industry tihhmasawn tura hma a lakna chu fakawm tiin, state hmalakna pui SEDP-in mipui dah pawimawh hmasa a hmalak a ni chu lawmawm a tih thu a sawi, Hmasawnna hna thawh leh hmalaknate reng reng hi tun amite tan chauh nilo, kan tu leh fate chanvo tur tichhe lova, an tana ram tha leh nuam kan siam zel theihna tur zawnga kalpui tur a nih thu leh, mi harsa ber te chawikanna tur hawi zawnga kalpui a nih tur thu a sawi.

State hmasawnna atan state leh central sawrkar chu inhnaih taka thawk dun tlat tur a nih thu sawiin Vice-President chuan Mizoram tan pawh tu hnaiah Prime Minister's Development Initiative for North-East (PM-DevINE) Scheme hnuaiah Rs. 600 crores dah a nih thu a sawi a. India hmarchhak state-te hmasawnna sawrkar laipuiin a ngaihtuah thu a sawi rualin, heng state ten an Legislative Assembly ah hmeichhe member tam zawk an neih chu pawimawh a ti a. Tun dinhmunah parliament ah pawh 11% chauh hmeichhia an nih thu a sawi. Vice President chuan mahni pianpui tawng ngaihpawimawh nachang hriat chu tul a tih thu a sawi tel a. Tawng hrang hrang a tam thei ang ber thiam tum chu tha a tih rualin, chumi hma chuan mahni tawngah kan chian a, kan chawilar thiam hmasak a pawimawh a ni, a ti.

Vice President-in thu a sawi zawh hian House Leader Chief Minister Pu Zoramthanga chuan lawmthu sawina a nei a. State buai ber te zing ami ni thin kha tunah chuan state ralmuang ber Mizoram chu a nih tak thu leh, vawiin thlenga Assembly rorelna boruak tha tak neih thin a nih chhan pawh he state ralmuanna in a ken tel thil a nih thu a sawi a. State dangte tan pawh he remna leh muanna hi entawntlak a nih ngei a beisei thu a sawi a ni.

Vice President Pu Venkaiah Naidu hian naktukah Mizoram a chhuahsan dawn a ni.