No.6966/2020-2021
Nimin tlai dar 4 khan Vice President M. Venkaiah Naidu chuan Governor P.S. Sreedharan Pillai Lehkhabu ziah 125-na, “Oh, Mizoram” tih chu Video Conference kaltlangin Hyderabad atangin a tlangzarh a. He Lehkabu hi Indus Scrolls Press in chhut a ni a, a hawnna Inkhawm hi India International Centre, New Delhi-ah nimin tlai khan neih niin Dr. Jitendra Singh, Hon’ble Minister of State i/c PMO in a kaihruai a. He hunah hian Chief Minister Pu Zoramthanga thusawi pawh ngaihthlak a ni.
Lehkhabu tlangzarhtu Vice President M.Venkaiah Naidu chuan Mizoram chu hmun mawi tak, a chhunga cheng te pawh hrisel tha, hawihhawm, remna leh muanna ngaina leh rimawi lama sang tak an ni a. Mizo hnam lam hrang hrang te hmuh nawm a tih thu leh kut(festivals) neih te chuan mit a la bik tih thu te a sawi a. “Songbird of the East” tiin mi tam zawk chuan an hre thin a ni, a ti. Chhiarpui hnuhnung ber 2011 atanga a land an chuan Mizoram chu hmeichhe naupiang tam lamah an en tawn tak hle a. Mizoram chhungah naupiang chhianchhiahnaah mipa naupang 1000 piang an awm chuan Hmeichhe Naupang 971 piang an awm nia chhut a ni a. Hei hian Mizoram khawtlang nun a hrisel hle a, Hmeichhia te an en hrang lo tih a lang a, a lawmawmin midangte tana thil entawn tlak a ni, a ti.
India Hmarchhakah hnam hrang hrang 220 an awm tih sawiin Hmarchhak bial chu tawngah leh hnam zia rang pholanna kawngah a hausa hle nia a hmuh thu a sawi a. Ei leh in kawngah pawh hmundang te entawn tur khawpin an thiang hlim a; organic farming kawngah pawh Hmarchhak bial hian hma hruaiin Sikkim phei chu Organic State hmasa ber a ni,a ti. Vice President M Venkaiah Naidu chuan tuna India in a buaipui lian tak chu inkaihchhawn theih ni si lo – nun dan phung inthlahdah avanga kan vei mek(Non – commucable Diseases) natna te a ni a. “Heng NCD – Taksa thau lutuk, Zunthlum, Cancer, Thisen sang leh a dang te hi ei leh in uluk bakah nun dan hrisel zawk nunpuia hneh chi a ni a. He mi kawngah hian Hmarchhak mipui te hian hma an hruai thei a ni”, a ti.
Governor Pillai Lehkha ziah tlangzarhnaah hian Chief Minister Pu Zoramthanga pawhin thu a sawi a. Governor Pillai chu a lo hriat thin dan chuan Politics leh Dan lama mi hlawhtling leh khawtlang tana thawh hlawk tak a ni a. Hlaphuah leh thuziah lamah a lo them thiam leh zel tihlam chu a tirin hriatloh thu a sawi a ni. Chief Minister Pu Zoramthanga chuan Lehkhabu 125 lai mai ziah chu thil awlai lo leh hlawhhlinna ropui tak a ni, a ti.
Kan Governor in Mizoram ngaihna lam hla thu “Oh, Mizoram” mawi taka a phuah chu a dangdaiin a ngaihsan awm hle a ni a ti a. A rawn awm chhung reiloteah Mizoram a rawn ngaina mai ni lovin Mizo mipuite pawhin kan ngaina a; Sawrkarna lama fawngvuantute pawhin thawhpui nuam kan tiin sawrkar hotuluber nih a tlin em em a ni a ti. Lehkhabu tam tak la ziak chhunzawm zel turin duhsakna a hlan nghal bawk a ni.
He Lehkhabu hi COVID-19 avanga thla 10 chhung inkharkhipna hnuaia a lehkhabu ziah 18 zing a mi a ni a. Governor Pillai hian thupui hrang hrang - history, law, political science, economy, social, travelogues, poetry, satire, literature, etc., huangah te thu leh hla a ziak thin a ni. He hunah hian Pu VP Joy, IAS, Secretary, Coordination & Security, Cabinet Secretariat leh Pu Prafulla Ketkar, Editor, Organiser te pawhin thu an sawi bawk a ni.
Attachment
- Loading attachment...
