No.4230/2021-2022

Aizawl, the 10th March 2022: Vawiin chawhnu khan Vice President M Venkaiah Naidu chuan Raj Bhavan-ah Mizoram University(MZU) hotute, NGO Coordination Committee hruaitute, Mizoram Kohhran Hruaite Committee aiawh, Ex- Mizo National Army (Ex-MNA) hruaitute, Zo Reunification Organisation(ZORO) hruaitute leh Ukraine buaina rawn chhuahsana Mizoram rawn thleng ta hmeichhe pakhat te chu a kawm a. Governor Hari Babu Kambhampati pawh he inkawmnaah hian telin Vice President hnenah pawl hruaitute ngenna te a lo thlen pui a ni.

Vawiina Vice President M Venkaiah Naidu in mipui vantlang rawngbawltute a kawmnaah Mizoramah Kohhran te leh tlawmngai pawl hrang hrang ten sawrkar tha taka an thawhpui thin tih a hriat thu tea sawia. Heng pawl tangkai tak tak hnathawh pawimawh tak tak te leh Mizoram hmasawnna atana an hlawhtlinnah te lawmthu a sawi a. Sawrkar tha taka thawhpui chhunzawm zel tur te, remna leh muanna a awm theihna atan theihtawp chhuah zel tur leh India ram inpumkhatna atan pawl tangkai tak ni zel turin a chah a ni.

MZU hotute chuan MZU hmasawnna te leh mamawh te Vice President hnenah hian an thlen a. MZU hotute chuan Lunglei khawpuia MZU Southern Campus chu a taka kalpui a nih thuai theihna tur leh hmalak nana thil tihfel hmasak ngai te chinfel thuai a nih theih nan hma lak sak turin Vice President hi an ngen a. Mizoram thalaite Sports ah theihna sang tak an neih thu sawiin Mizorama College of Physical Education din turin rawtna an thehlut a. Mizoramah Damdawiin inenkawlna tha a awm tlem avangin AIIMS ang tluka tha Multi-Speciality Hospital din turin rawtna an thlen a. Champhai leh Mamit ah te College tha bik, Star College din turin rawtna an thehlut bawk a ni.

Kohhran leh Tlawmngai pawl hruaitute chuan Mizoram mipui tana thil pawimawh deuh deuh a an hriat te Vice President hnenah hian tawngkain an sawipui a; ziakin Mizoram mamawh te an thlen bawk a ni.Kohhran, Tlawmngai pawl te leh pawl dang hotute chuan Myanmar Refugee Mizoramah 30,000 chuang an rawn lut tawh a, an dinhmun a khawngaih thlak zia leh tanpui an ngaih zia te, India sawrkar chu Democracy lian ber a nih anga raltlante chunga ngilneih chhuah tur leh tanpuina pe turin an ngen bakah a lo mikhualtute khua leh district te sum leh paia chhawmdawl an ngai tih an sawi a ni. He hunah hian Mizo Tawng chu 8th Schedule of the Constitution-ah telh an rawt a; Mizoram tan IAS Cadre hran neih a tul thu te sawi a ni a. Bru Refugee te Tripura a awm hlen tura inremna siam fel a nih tawh angin an Vote te Mizoram atanga paih thuai a tul thu te pawh an sawi bawk a ni. Assam leh Mizoram ramri chungchang te pawh sawi a ni a; inremna tluantling a awm theih nana Central Sawrkar chu hma la tura an beisei thu te sawi a ni a. Border Trade a taka kalpui a nih theih na tura central sawrkar chu hma la tur leh Assam Rifles te Aizawl khawpui laili atanga sawn chhuak tura ngenna te pawh siam a ni bawk a ni.

Mizoram University aiawh hian Prof JK Patnaik, Pro Vice Chancellor leh a thawhpuite an tel a. NGO Coordination Committee aiawhin Pu R.Lalngheta, President, Central Young Mizo Association (CYMA), CYMA General Secretary, MZP President, MHIP President, MUP President leh MSU General Secretary te an tel a. MKHC aiawhin Rev Dr Vanlalnghaka Ralte leh a thawhpui te an tel a. Ex-MNA leh ZORO aiawhin an hruaitute an tel bawk a ni.