Vigilance Week 2018 chu India ram pumah October 29 atanga November 3 thleng neih tura ruahman a nih angin vawiin khan he Week pual hian Mizoram Sawrkar office tinah chawhma dar 11 khan hleprukna nuaibo tura thutiam sawi rual hun hman a ni a. Kumin Vigilance Week thupui hi "Eradicate Corruption - Build a New India" tih a ni.
New Secretariat Complex tualzawlah Mizoram Chief Secretary Pu Arvind Ray kaihhruaiin New Secretariat-a officer leh staff zawng zawng ten thutiam chhamna hun hi an hmang a. Civil Secretariat Annexe-a Officer leh Staff ten Information & Public Relations Department Commissioner & Secretary Pu Biaktluanga kaihhruainain Secretariat Annexe Block-A Ground Floor-ah thutiam an chham bawk a. Department dangah Head of Department te leh Head of Office te kaihhruainaa hman a nih bakah District tinah DC te kaihhruaiin he hun hi hman a ni bawk.
Tukin zing dar 6:30 khan Vigilance Week puala kawng zawh (rally) neih a ni a. Aizawl Hmar lam leh Chhim lam atanga kawng zawh tanin Vanapa Hall kawtah an intawk khawm a. Millenium Centre kawt atanga chhuakte hi Anti Corruption Branch (ACB) SP Pu Laldawngliana’n a vailiam a, Sikulpuikawn atanga chhuakte hi Vigilance Deputy Secretary Pi Donnie chuan a vailiam thung. Vanapa Hall kawtah programme tawi buatsaihin ACB Director Pu Mukesh Kumar Meena kaihhruaina hnuaiah kalkhawmten pledge an sawi rual a ni.
