India Sipai ten Pakistan sipai te an Hnehna Ni(Vijay Diwas) kumtin December ni 16 a kan hman thin chu sawrkar ruahhmanna angin tukin khan War Memorial, Treasury Square-ah hman a ni a. He hunah hian sipai huaisen, India ram tana ram tana nunhlan tute zahna entir nan sawrkar mi pawimawh ten War Memorial thlanlungah pangpar an dah a ni.

Tukina Wreath Laying Ceremony-ah hian Governor P.S. Sreedharan Pillai chuan hma hruaiin Sipai huaisen martarte zahna lantir nan War Memorial-ah pangpar dahin zahna chibai a buka. Hemi hnuah hian Home Minister Pu Lalchamliana chuan pangpar a dah ve leh a. Chief Secretary Pu Lalnunmawia Chuaungo, Pu SBK Singh, DGP, Home Secretary Pu Lalbiakzama, Aizawl District Bawrhsap Pu Vanlalngaihsaka, Col. GRV Reddy, Station Commander, Station HQ Aizawl leh midangte pawhin War Memorial-ah hian sipai huaisen te hriatrengna leh zahna lantir nan pangpar an dah bawk a ni.

December ni 16, 1971 kum khan Ramna Race Course tuna Suhrawardy Udyan ni ta, Dhaka khawpui, Bangladesh-ah India Sipai hotulian, Lt. Gen Jasgit Singh Aurora hnenah Pakistan General Amir Abdullah Khan Niazi leh a sipai 93, 000 te chu India laka tlawmin an inpe a ni. He hnehna pawimawh tak avang hian Bangladesh chuan Pakistan atangin zalenna a neih phah a. He Ni pawimawh tak hriatrengna atan hian kumtin Vijay Diwas hi India ram hmun tinah leh Bangladesh-ah te hman ziah a ni.