No.4187/2020-2021  

Dated Serchhip, the 18^th August, 2020:   Pu Kumar Abhishek, IAS, District Election Officer, Serchhip District, Serchhip chuan kan hma lawka Village Council in thlan 2020 lo awm turah Vote thlak ni a inkaihhruaina dan tur chungchangah a hnuai ami ang thupek a ti chhuak.

Mizoram State Election Commission (SEC) in Order No.B.14015/1/2020-SEC/LC/39 Dt 5^th August, 2020 hmanga hriattirna a lo tihchhuah tawh behchhanin, August ni 27, 2020(Ningani)-a Serchhip District huamchhunga Village Council inthlan buatsaih turah him leh felfai taka kalpui anih theih nan, vote thlak ni (Poll Day) a vote thlak tur leh duty ten an zawm tur thupek a hnuaia tarlan ang hian tih chhuah a ni.

POLLING STATION: Polling station leh a chhehvelah tumkhatah mi 50 aia tam an pungkhawm tur a ni lo. He thupek lo kengkawha, ruahmanna lo siam turin khaw tina VLTF, NGO leh MPF te beisei an ni a. Vote inthlak chhawk dan tur ruahmanna a remchan dan angin, house number indawt dan emaw, veng thler angin emaw, Branch YMA/Section mil in darkar bithliah siam a, vote inthlak chhawk dan tur lo ruahman tur a ni.

Physical distancing (6 feet) dan zawm reng tur a ni a, MPF/NGO/Security/Medical duty te pawhin, he dan hi an zawm ngei tur a ni. Polling Station leh a chheh velah chil chhak phal a ni lo va, khuh dawn pawhin rawmawl hmanga hmui hup tur a ni a, Face mask vuah ngei ngei bawk tur a ni. 

POLLING BOOTH: Vote thlak tur ten feet 6-a inhlata din tur a ni a, chhinchhiahna siamah chauh an intlar tur a ni. Luhna leh chhuahna hran siam te dik taka zawm tur a ni a, Vote thlak tur te inziahluhna tura dah register-ah hming leh phone number ziahluh tir vek tur a ni. He register a hming ziahluh hi Village Level Task Force te kutken tura beisei a ni. Vote thlak tur ten face mask vuah vek tur a ni a, vuah lo te chu vote thlak phalsak an ni lo ang. Polling officials, candidate leh an agent te bakah phalna nei a Polling Booth a lut ten face mask an vuah vek tur a ni. Polling booth a lut zawng zawng ten hand sanitizer chhawp an hmang ziah tur a ni. 

Kum upa leh tar chak lo, nu nau pawm leh rualbanlo (PwD) te, damlo bawrhsawm deuhte chu intlar tir lovin, vote thlak tir nghal tur a ni. 

COUNTING HALL: Vote chhiarna hi August ni 27, 2020 (Ningani) Tlai dar 5:00 hnulam atangin neih tur a ni a. Vote chhiarna hmunah hian Candidate leh Election Agent/Counting Agent-te bak chu Counting officials te chauh awm phal a ni a. Zan Dar 8:30 atanga zing lam Dar 4:30 inkar pawn chhuah khap/curfew a nih avangin, hemi hun chhung hian a chunga tarlan phalna nei bak chu tumah awm phal a ni lo. Counting Hall chheh velah pawh vote chhiar ngaithla turin tumah pungkhawm phal a ni lo. Result hi tlangau/public address system hmanga puan tur a ni a.   Hemi chungchang hi District Magistrate, Serchhip District-in Prohibitory Order a lo chhuah tawh a ni. (vide No. J. 12017/2/2020-DC(SRCP)/412 dated 10^th August, 2020).

MOBILE PHONE CHUNGCHANG: Inthlanna buatsaihtu leh Police duty te bakin Polling Booth leh Counting Hall chhungah mobile phone ken luh phal a ni lo. Anni pawhin silent mode-ah an dah tur a ni.

MEIZUK CHUNGCHANG: Polling Station huam chhung leh Counting Hall chhungah meizial zuk khap tlat a ni a, hei hian inthlan buatsaihtu leh duty zawng zawngte a huam vek a ni.

Mitin te kan him tlan nan leh inthlanna dik leh felfai tak kan neih theih nan, he thuchhuah hi mipuiten lo chhinchhiah a, zawm vek turin kan inngen a ni.