Mizoram State Election Commission-in April ni 30, 2015 a Village Council inthlan a buatsaih tur a Serchhip District chhunga Returning Officer atana ruat te tan vawiin nileng hian Serchhip DC Conference Hall-ah Training buatsaih a ni.

Training hawnna inkhawm tawi te neiah Pu Lalhmansanga, MCS, Election Officer chuan Returning Officer kalkhawmte fuihna thu sawiin Returning Officer atana ruat an nih atang khan State Election Commission hnuaiah deputation in an awm ani tih an inhriat a ngai a, election process a zawhfel hma chuan State Election Commission kaihhruaina hnuai ah an awm avangin an hnathawh lai mek bakah hna pawimawh tak dang an kawp tel rih ani tih an inhriat a pawimawh a ni a ti a, an hnuaiah Polling Officials engemawzat an awm dawn avangin an mawhphurhna a sang em em a, an hna an thiam bel hle a tul dawn a ni a ti a, training chu tha tak leh uluk taka tel tura hrilhin an hnuai ami te tana rawn tlak leh belhchian dawl taka thawk thei tura inbuatsaih tumna rilru pu turin a chah bawk a ni.

Returning Officer te pual Training hi thupui hrang hrang pathum hmanga then hran a ni a, “Model Code of Conduct” chungchang hi Pu Lalnunfela, MCS, Master Trainer in a zirtir a, Pu K.Laldinthara, HCA, LAD, Master Trainer-in “Returning Officer’s Handbook” chungchang ah zirtirna a pe a, Pi B. Malsawmtluangi, MCS, Master Trainer chuan “The Mizoram (Election to Village Councils) Rules, 2014” chungchang a zirtir thung a, session tinah hian sawihona hun leh hriatthiamloh te inzawhfiahna hun hman a ni bawk a ni.

State Election Commission hian Village Council inthlan chungchang thuchhuah siam tha leh in thuchhuah a siam hmasak a “Scrutiny of Nomination” hun atana ruahman April ni 14, 2015 (Thawhlehni) chu Dr. B.R.Ambedkar piancham anih avanga Sawrkar Laipuiin public holiday atan a puan tak si avang leh public holiday a “Scrutiny of Nomination” hi tih theih anih loh avangin April ni 16, 2015 (Ningani) ah a sawn a ni.

Serchhip District ah hian Village Council 49 awmin General seat 159 leh hmeichhe tana reserved seat 56 a awm a, Returning Officer 49 ruat an ni bawk.