No.3843/2020-2021

THU HMAHRUAI

(a) He Model Code of Conduct hi State Election Commission, Mizoram hnuaia Inthlanna zawng zawngah hman a ni ang.

(b)He Model Code of Conduct hian hengte hi a huam ang :
i) Political Party
ii) Inthlannaa ding
iii) Minister
iv) MP/MLA
v) CEM/EM/MDC
vi) Municipal Councillor
vii) Council Member
(vii) Inthlannaa inhnamhnawih mipui rawngbawltute.

2. He Model Code of Conduct hi Mizorama District pakua - Aizawl, Lunglei, Champhai, Kolasib, Serchhip, Mamit, Hnahthial, Saitual leh Khawzawl District, Autonomous District Council pathum - Chakma, Lai leh Mara leh Sinlung Hills Council hnuaia inthlan puan a nih veleh hman tan nghal tur a ni.

II. KAIHHRUAINA TLANGPUI
Mi tu mahin hengte hi an ti tur a ni lo :-

a) Chi leh chi, inhuatna chawh chhuah;

b) Inthlannaa dan bawhchhiatna awm thei, The Chakma/Lai/ Mara Autonomous District Council (Constitution, conduct of Business, etc) Rules, The Chakma/Lai/Mara Autonomous District Council (Election to Village Councils) Rules, The Mizoram (Election to Village Councils) Rules, 2014, The Mizoram Municipalities (Election to Local Councils) Rules, 2015, The Mizoram Municipalities (Election of Councillors) Rules, 2007, The Mizoram (Election to Sinlung Hills) Rules, 2019 leh The Mizoram Prevention of Defacement of Property Act 1995-in a sawite;

c) Khingpuite leh party hruaitute mimal nun, mipui rawngbawlna lam nena inkaihhnawih ni si lo, insawi chhiatna;

d) Vote duhna avangin sakhua bik emaw hnam bil bik emaw ngaihtuahna chawhchhuah;

e) Sakhaw biakna hmunte mahni party sawi mawina atana hman;

f) Sum leh pai hmanga inthamna te, invau te, mi lema chan te, vote thlaktu turte kal lam leh haw lam motor-a phurh, polling station atanga meter 100 bial chhunga lamtanga siam tura campaign te, Vote thlak tawp hun bi tuk atanga chhiar leta darkar 48 huam chhunga campaign;

g) Mi mal in bula lungawi lohna lantir leh indan;

h) Khingpuite inhmu khawm emaw kawng zawh emaw thil dang eng emaw an tih, ti buai zawnga awm;

i) Sum leh pai hmanga voter-te thlem.

III. THU THEHDARH

1. Political party-te leh Candidate tu pawhin, anmahni tantute chu, mimal hmun emaw, in emaw, an ram hungna bang emawah reng reng ziaka an rem tihna la hmasa lo chuan flag te, thuziak te, hriattirna leh fak mawina thu ziak te an tartir tur a ni lo.

2. District Magistrate, Sub-Divisional Magistrate emaw Executive Magistrate phalna la hmasa lo chuan eng Political party emaw Candidate-te’n vantlang hmunah engmah an tar tur a ni lo.

3. Election pamphlet emaw poster emawah a chhutu (Printer) leh a chhuahtu (Publisher) chiang taka tar lan tur a ni. Hei hian a Chhutu leh Chhuahtute, an thu chhuah dan kalh leh ngaimawh tur awm theiah mawhphurhna an chunga bel theihna tur a ni.

4. Phalna pe theitu hnen atanga phalna lak hmasak anih loh chuan Au rinna (Public address system) Political party emaw Candidate-te’n an hmang thei lo ang. Au rinnate hi hman a nih pawhin Dar 6:00 Am - 10:00 Pm chhungah chauh hman tur a ni. Damdawi in, sakhaw hmun bul leh school bul hnaiah, bengchheng siamthei thilah aurinna hman anih lohna’n Political Party leh Candidate-te’n theih tawp an chhuah tur a ni ang.

IV. A HUHOA INTAWH KHAWMNA

1. Political party-te emaw Candidate-te’n mipui intawhkhawmna an buatsaih dawn chuan a hma daihin District Magistrate emaw Sub-Divisional Magistrate emaw Executive Magistrate leh bialtu Police hotute, an intawh khawmna hmun leh hun tur an hriattir tur a ni, anniin dan leh thupek te, leh motor chet vel dante an lo thunun leh duan lawk theihna’n.

2. Political Party emaw Candidate-te’n intawh khawm an tumna hmun chu, chutiang tih khapna hmun a nih leh nih loh an chian hmasa tur a ni. Chutiang khapna hmun a lo nih chuan, District Magistrate emaw Sub-Divisional Magistrate emaw Executive Magistrate hnen atangin phalna an dil hmasa tur a ni.

3. Intawh khawmna hmunah buaina a chhuak a nih chuan anmahniin chinfel mai tum tur a ni lo a. Intawhkhawmna hmuna Police Duty-te chu hrilh vat a, an tanpuina ngen tur a ni.

V. KAWNG ZAWH

1. Political Party emaw Candidate huaihawtin emaw Candidate puitu mi intel khawm tu pawhin kawng zawh an huaihawt dawnin, hma takin District Magistrate emaw Sub-Divisional Magistrate emaw Executive Magistrate emaw bialtu Police Station an hriattir tur a ni.

2. Kawngzawh huaihawttute chuan an zawh tan hun leh hmun, leh a tawpna hmun tura an ruat chu thuneitute an hriattir ang a, thuneitute rem ruatna a nih loh chuan an ti danglam tur a ni lo.

3. Kawng zawh an tumna hmun chu chutiang tih khapna a ni tur a ni lo. Amaherawhchu, thu neitute’n phalna an pek chauhin an zawh thei ang a, Motor kal velna dan kaihhnawih an zah tur a ni ang.

4. Motor kal vel ti buai lo zawngin kawng zawh tur a ni. Kawng zawh tur a lo thui viaua kawng intawh khawmna pal tlang ngai lai a awm a nih phei chuan motor kal lai inhnawh khawmtir tur a ni lo.

5. Political Party pakhat aia tamin emaw Candidate pakhat aia tamte’n kawng thuhmunah emaw eng emaw laia kawng thuhmun zawh tur a awm chuan, intih buai palh awm thei leh motor kal vel tih buai lohna’n a huaihawttute an insiam rem hmasa tur a ni. Hetiang a lo awm dawn chuan bialtu Police hriattir hmasak a, an tanpuina ngen tur a ni ang.

6. Kawng zawhtute’n eng emaw hmanrua, mite tih natna’na hman theih lam chi reng reng an keng lo a ni tih a huaihawttute’n an chian hmasa tur a ni.

7. Mihring lem din, tu mi mal emawa ngaih theih emaw, Political Party khingpui lam hruaitu ai awh anga ngaih theih tute emaw diriam vanga buhpawl, buara emaw thil dang ilova siam chu hal emaw sawisak emaw khap tlat a ni.
VI. INTHLAN NIA TIH TUR LEH TIH LOH TUR
Political Party leh Candidate-te’n-

1) Vote nei zawng zawng te’n tih buai loh leh harsatna awm loa zalen taka vote an thlak theihna’n Inthlannaa hnathawkte an thawhpui tur a ni.

2) An mite, eng emaw ti tura ruat bik an neih chuan an hming, party hming leh symbol chauh chuanna identity card emaw badge emaw an siamsak thei ang a, Polling Booth chhungah erawh chuan an tar emaw an bel emaw thei lo ang.

3) Vote thlak turte an serial number lehkha themtea an pe duh a nih pawhin lehkha varah chauh ziakin, symbol, candidate hming leh party hming chuang loin an pe thei ang.

4) Inthlanna hmun bul hnaiah anmahni tanpuitu mipui pun khawmtir phal a ni lo.

5) Inthlan nia motor hman chungchangah khuahkhirhna awmte tha taka zawm tur a ni. Motor hman tura phalna lakah chuan langsar takin Permit tar tur a ni.

6) Zu leh ruih hlo lam chi reng reng sem khap tlat a ni.

VII. POLLING BOOTH LEH COUNTING HALL
Candidate, Election Agent, Polling Agent leh Voters tih chauh lo chu, State Election Commission emaw District Election Officer emaw Returning Officer emaw phalna lo chuan Polling booth-ah luh phal a ni lo.

Hetiang bawk hian vote chhiarna hmun Counting Hall-ah Candidate leh Counting Agent-te chauh lo chu State Election Commission emaw District Election Officer emaw Returning Officer in phalna a pe a nih si loh chuan an lut thei lo ang.
SAWRKARNA CHELHTU PARTY EMAW MI PAWIMAWH TE KHUAHKHIRHNA

Candidate emaw mi pawimawh Minister, Member of Parliament, Member of Legislative Assembly leh Sawrkarna chelhtu Political Party-te’n an thu neihna hman kawngah an insum tur a ni a, hengte hi an ti tur a ni lo:-

1) Sawrkar motor reng reng inthlanna kaihhnawihah hman loh tur.

2) State Election Commission-in inthlan a puan tawh chuan hmasawnna lam hawia bul tanna’na lung phum emaw thawh zawh tawh hawnna emaw, chutiang lam kaihhnawih hawnna inkhawm buatsaihah an tel tur a ni lo.

3) Minister, Member of Parliament, Member of Legislative Assembly, CEM, Coucillors, thu neitu dang leh Political mi leh sa reng rengin sum hmanga tanpuina emaw hmasawnna lam thil an pe chhuak tur a ni lo.

4) Polling Booth chhungah emaw Counting Hall chhungah emaw, he inthlannaa Candidate, voter chauh phalna bik pek an nih loh chuan an lut thei lo.

5) Sawrkar hna thawk emaw Sawrkar lam kaihhnawih thil reng reng sawrkar lai Political Party hruaitute’n inthlanna lam kaihhnawihah an hmang tur a ni lo.

6) Vantlang hmunhma – Community Hall, Playground etc. te hi sawrkar lai Political Party chauh ni lo, Political Party dangte pawhin rualkhai takin an hmang tur a ni.

7) Sawrkar Guest House, Circuit House, Inspection Bungalow etc ahte hleih nei loin thlentir tur a ni.

8) Hmasawnna hnathawhna tur lam chi reng reng Tender chhuah loh tur a ni.

9) Sawrkar hna thawh lam chawi larna (Advertisement) te Chanchinbuah emaw T.V.-ah emaw tar lan phal a ni lo.

10) Sawrkar hna lak, Sawrkar thuneihna Company, Corporation etc huam telin, chawlh rih tur a ni.

11) Hun rei vak lo chhung atan pawh ni se, Sawrkar-ah emaw Sawrkar thu neihna eng pawlah pawh hna thar lak rih loh tur a ni.

12) Sawrkar atanga tanpuina lam chi reng reng pek chhuah rih loh tur a ni.

13) Ruahmanna thar lam hawi reng reng puan chhuah rih loh tur a ni a. A hnuaia scheme leh programme-ah te hetiang hian khuahkhirhnate hi siam a ni.

a) MGNREGS : Hna kal lai a awm a nih chuan Job Card neitute’n an thawk chhunzawm thei ang. Hna thar an tan tur a ni lo. Eng emaw avanga hna kal laiah hna thawh theih a nih loha, chu project chhungah tho hna thar thawh tul a nih pawhin District Election Officer kal tlangin State Election Commission rem tihna lak tur a ni.

b) MPLADS, MLALADS, etc.: Hengahte hian hna kal lai thawh chhunzawm phal a ni. Amaherawhchu, hnathawhna tura work order chhuah tawh hna la tan hman lo chuan an hna an tan rih tur a ni lo. Model Code of Conduct hman a nih chhung chuan heng Schemes-a hman tur sumtih chhuah emaw puan chhuah emaw khap tlat a ni.

c) Sawrkar ding lai Scheme: Sawrkar ding lai scheme dawng thei tur te thlan loh tur a ni a, thlan sate hnenah pawh eng mah sem rih loh tur a ni. Model Code of Conduct hman chhung chuan heng scheme chungchanga training emaw campaign emaw en dik emaw tih rih loh bawk tur a ni.

d) In sak tanpuina : Sawrkar hma laknaa in sakna tur tanpuina dawngte sum lo pek chhuah mek, sak hna tan
tawhte chu inkaihhruaina an neih dung zuiin pek chhuah zawm zel phal a ni. In sak thar leh tanpuina pek thar erawh chu Model Code of Conduct hman chhung chu khap a ni.

e) Land Revenue & Settlement Deptt / Site Allotment Advisory Board/ Village Council-te’n In hmun leh ram pek emaw recommend emaw an ti tur a ni lo.

Heng khuahkhirhnate hian hna tul leh hmanhmawh bik chhawmdawlna lam kaihhnawih Sawrkar laipui Relief Scheme - National Disaster Response Fund (NDRF) leh State Disaster Response Fund (SDRF) te chu a huam lo ang.

Achung Bung VIII Para 13-ah hian Centrally Sponsored Scheme-te chipchiar taka tar lan sen vek a nih loh avangin a hlawm lian deuhte entirna’na tar lan mai a ni. Chuvang chuan he Para 13-na hian heng Scheme zawng zawngte hi a huam vek tho a ni.

IX. OBSERVER-TE

Inthlanna kaihhnawih sawiselna leh harsatna te chu Candidate emaw an Agent-te’n State Election Commission- in tul a tih anga a ruat Election Observer-te hnenah an thlen thei ang.