Vawiin khan Agriculture Minister Pu H. Liansailova chuan Agriculture Directorate (Research and Education) buatsaih ‘Vision 2020 Krishi Vigyan Kendras, Mizoram’ tih lehkhabu chu a pisaah a tlangzarh.

Tlangzarh paha a thusawiah Pu H. Liansailova chuan he Department a chan tirh atanga beiseina sang tak a neih thu sawichhuakin thawktute leh ama inkarah inhriatthiamna thui tak neia thawhona tha thak a awm avangin nasa takin Agriculture Department hian hma a sawn a, mipui mimir leh Assembly rorelna sangah meuh pawh fak an hlawh thei nia a hriat thu a sawi. Minister chuan he Department thawktute thahnemngaihna avangin kuminah pawh kum hmasa aia buh 30% lai a sang an seng a beisei thu te, KVK mithiamte zarah thlai chi leh buh chi tha S.R.I ang te tam zawk thar chhuah a nih tak thu te leh buhthartam kumpuan pawh a hlawhtlin ngei a rin thu a sawi a. Minister chuan hlawhtling taka lehkhabu tha tak Agriculture Department in a buatsaih thei chu lawmawm a tih thu sawiin Mizoramah hmasawnna rah duhawm tak a thlen ngei a beisei thu a sawi a ni.

Phek 540 a chhah, thlalak, map leh data pawimawh thahnem tak keng tel hi Mizoram hmun hrang hranga KVK Scientists te kutchhuak a ni a. Lehkhabu puitlin theihna tura tha thawhtute District tina KVK Programme Coordinator te leh KVK mithiamte kutchhuakah hian Agriculture leh a kaihhnawih kawng hrang hranga hmalak dan tur te, leilung leh sik leh sa mila hmalak uar zualna tur zawnchhuah dan tur te, KVK kalphung tur bakah leilung dinhmun uluk taka zirchian dan tur te chipchiar taka tarlan an ni.

Vision 2020 Krishi Vigyan Kendras, Mizoram tlangzarhna hun hi Agriculture (R &E) Director Pu OP Singh-a’n a kaihruai a. Agriculture Secretary Pu TV Fambawl leh Horticulture Secretary Pu T. Sangkunga te bakah hmun hrang hranga KVK a thawktute leh Agriculture Officer te an tel a ni.