Vawiin chawhnu ah khan Industrial training Institute(ITI) auditorium ah Labour , Employment &  Industrial Training Department(LE&IT) leh Confederation Of Indian Industry(CII) tangkawp chuan State leh Central hnuai vocational course hrang zirlai te ko khawm in World Youth Skills Day a hmanpui. LE&IT Minister Pu Lalrinmawia Ralte pawh in he hun hi hmanpui in sumdawnna leh eizawnna kawnga mi hlawhtling sawmbik  ten zirlaite hnenah zirirna an pe a ni.

Vocational  traning centres hrang hrang atanga rawn kal khawm zirlai te hnenah Pu Lalrinmawia Ralte, LE&IT Minister chuan eizawnna atana hman theih thil thiambik neih thatna a sawi a. Hlawhtlinna nei tur chuan kawng bumboh paltlang phawt a tul thin thu sawiin mahni kutke a dingchhuak tawh mi hlawhtling te entawn thin turin a chah a ni. Khawvel ram ropui tak tak te lo dinchhuahna chu an ram leilung hauhsakna ai pawha hlu zawk Skilled labour te an nih thu  a sawi a. Kan anpui South Korea thiamna kan zir theih nan inlaichinna bul kan tan mek a. K-POP Contest  Mizoram a nghah a nih na chhan pawh huau huau ringawt a nih loh thu leh he thil hi South Korea kawngkhar kik na hmanraw hmasa a ni ti a. He cultural exchange piah lamah South Korea thiam thil hrang hrang zir theihna huntha a rawn in herchhuak dawn a ni a ti. Mizo tlangval aiin Mizo nula te an tuarchhel zawk emaw tih mai turin rampawn a eizawng zingah Mizo nula an tam tawh a, tlangval ten tan an lak a hun tawh a ni a ti a. Ram pawn a hnathawh in tih hmuh in fimkhur tulna lai te erawh hmuhhmaih chi a ni loving a ti.

World Youth Skills Day programme hi Pu V. Lalremthanga, Secretary, LE&IT in a kaihruai in he hunah hian Pu Rotluanga, Addl.Secy, LE&IT,  Pu K.Lalhmingthanga, acting Chairman, CII, Mizoram, Pu R.Vanlalzauva, Director, Mission Foundation Movement(MFM) leh Pu R.Ramhmangaiha, President, Hnamchhantu ten zirlaite fuihna thu an sawi a. ITI, Aizawl atanga zirchhuak hmasa mi hlawhtling tak tak 7 hnenah chawimawina thuziak hlan a ni a. Zirlaite hi vawiin tlai dar 6 a live a tihchhuah he ni puala Prime Minister Pu Narendra Modi thusawi thlirpui an ni.