Election Commission of India chuan Mizoram Inthlanpui 2013-a vote tla chhiar ni atan 9th December, 2013 (Thawhtanni) a ruat tawh angin Mizoram District 8-te chu an inbuatsaih chho mek a. Lunglei District-ah pawh Saikuti Hall hnuai ber chu Counting Hall atan duan a ni a, vote chhiarna tur pindan 2-a dawhkan leh thutna te, Phone leh Internet mamawh tur ang ang bakah Media Centre leh Communication Centre tur pawh buatsaih mek a ni.

Vawiin khan Lunglei District DEO/DC Pu V.Sapchhunga hovin Lunglei SP’s Office Conference Hall-ah Counting Officials ten training an nei a, vote chhiarna atana thil pawimawh an hriat turte chu DEO-in a hrilhifiah a ni. Training-ah hian Counting Officials te bakah RO, ARO leh Election officials te pawh an tel a. Counting Official zawng zawngte chu Badge siam sak an ni a, Thawhtanni khian zing dar 8:00 atangin Vote chhiar tan tur a nih avangin Counting Officials zawng zawngte chu zing dar 7:00 aia tlai lovah Counting Hall an thleng kim vek tura hrilh an ni. Thawhtanni-a Vote chhiarna hmunah Candidate, Election Agent leh Counting Agent te pawh zing dar 8:00-ah chuan an awm kim vek thei tura beisei an ni bawk.

Vote chhiar Ni hian District hrang hrangah Media Centre hawn a ni dawn a, chanchinbumite leh mipui ten result an hriat zung zung theihna tur leh Vote chhiar chungchanga thu hrechiang duhte tan Media Centre-ah telephone dah a ni ang a.