2944/2023-2024
Aizawl, the 4th December, 2023: General Election to the Mizoram Legislative Assembly, 2023 atana Election Commission of India (ECI) in inthlanna kalpui dan tur schedule of election a siam chu a hmawr bawk chhoh mek zel niin vawiin khan vote tlate chhiar niin naktuk December ni 5, 2023 hian election process zawhfel a ni ang.
Mizoram chhunga District 11 huamchhunga Assembly Constituency 40 a vote tlate chu tukin dar 8:00 atang khan Counting Centre 13 a Counting Hall hrang hrang 40 ahte boruak muanawm tak hnuaiah chhiar a ni. 22-Tuichang AC, Khawzawl District-ah vote chhiar zawhfel hmasak ber niin, 9:47 AM khan an chhiar zo a, chhun dar 12:00 hma khan vote chhiar hi zawhfel thawkhat niin result tlangpui pawh a hriat theih tawh a, chak leh awmze nei zawka vote chhiar a ni ta hi thil chhinchhiahtlak tak a ni.
Section 73 of the Representation of the People Act, 1951 (43 of 1951) in a phut angin State Legislative Assembly thar din turin election result-te RO ten an puanfel vek hnuah ECI chuan thlantlin tharte chu Official Gazette-ah tichhuakin Due-Constitution Notification a siam hmasak a ngai a. Due-Constitution Notification hi naktuk chawhnu hian ECI leh CEO Office-a senior official-ten Governor hnenah an submit dawn a ni.
October ni 9, 2023 a ECI in General Election to the Mizoram Legislative Assembly, 2023 a puan atanga a tul ang angte buaipuia inthlanna hlawhtling tak buatsaih a nih theih nana theihtawp chhuahtu Official-te chungah Election Department chuan lawmthu a sawi a. Inthlanna muanawm, felfai leh langtlang siam a nih theih nana theihtawp chhuahtu Media, MPF leh NGO-te fakawm a ti a, inthlanna tihlawhtlingtu Candidate, Political party leh mipuite chungah lawmthu a sawi bawk a. ECI in inkaihhruaina a tihchhuahte, Dan leh Sawrkar thupek hrang hrangte tha taka zawm a ni leh inthlanna muanawm leh entawntlak tak kan neih theih avangin mitin hnenah Election Department chuan lawmthu a sawi bawk.
