Election Commission of India chuan MP (Lok Sabha) inthlanpui lo awm tura mipuiten awlsam zawka Electoral Roll chungchang leh election kaihhnawih thil kimchang zawka an hriat theih nan Voter Verification and Information Programme (VVIP) a chhawp chhuak a. District Contact Centre dinin mipuiten election chungchanga hriat duh an neihte an zawhfiah theih nan Voter Helpline toll free No. 1950 District tinah dah a ni. He toll free No. 1950 hi hmang tangkai turin mipuite District Election Officer, Aizawl chuan a hriattir a ni. Mobile atanga phone tur ten 0389 dial hmasak tur a ni.

Inthlan puan a nih hnuah Model Code of Conduct kalh zawnga chetna rang taka complaint a luh theih nan leh a nemnghehna video/thlalak live-a mipuiten an thawn vat theih nan cVIGIL Mobile Application siam a ni bawk a. Electoral Roll a la lut lo te tan Electoral Roll-a inziahluh, address thlak leh a dangte ti duh tan Voter Helpline Apps leh rualbanlo te tan PwD Mobile Apps a chhawp chhuak bawk a ni. Heng IT Application hmanruate hi Mobile Phone Play Store atanga download mai theih a ni.