Nimin khan Pu Lalrinmawia Ralte Political Adviser to CM, Bialtu MLA ni bawk chuan W. Bunghmun khuain kum 113-a tlin lawmna hun khuallian niin a hmanpui.

He hun hmanpuitu Pu Lalrinmawia Ralte chuan W. Bunghmun khua chu khawthlang khua te zinga khaw upa pawl tak niin kum 113 lai hmel an lo hmu ta chu lawmawm a tih thu a sawi a,  Mizo Lalte zinga Kristian hmasa ber ni hiala chhal Raja Hrangvungan kum 1905 kuma lo din leh Kristianna thlenna hmasa khua W. Bunghmun chu khaw namai lo tak in nihna te hre renga tuna thangthar mekte pawh kawng engkima kan thlahtu kan pi leh pu,  nu leh pa te sul lo sut tawhna engah tumruhna nena hmalam pana khaw dintu hmasa te thawhrimna hrereng leh Kriatianna engin a thlenna khua hmasa an nihna hrereng chunga Pathian leh kan ram tana rinawm taka awm turin khawtlang mipuite a sawm a ni.

Bialtu MLA chuan kan chhehvel a miten hmasawn tuma tan an lak reng laia tan la lova kan awm chuan ngaiawh renga kan in ngaih lai hian kan lo  hnungtawlh reng thei a ni a ti, W. Bunghmun khua-a thalai te chu zirna lamah nasa taka tan la tura fuihin graduate thar a piangte chuan kumtin combined exam hrang hrang awm ah te in ziak tling tura hmachhawn ve zel tura chahin an khua atanga MBBS zirchhuak an awm tawh avanga lawmthu a hrilhin midang zelte pawhin chona nasa zawk nei a, hmalam pan turin a sawm bawk a ni.

Bialtu MLA Pu Lalrinmawia Ralte hian  W. Bunghmun khua in kum 113 a tlin hriatrengna lungphun chu hawng nghal in, he mi puala buatsaih Souvenir  Bungkhawmawitu tih chu tlangzarhna a nei nghal bawk a ni.

Thusawitu dang khualzahawm Pu K.L Pautu W. Bunghmun khawchhuak chuan W. Bunghmun khua kum 113-na leh he khaw din kum nemnghehna ni paha Organising Committee te tha ti chaka kawng engkima buaipuitu Bialtu MLA Pu Lalrinmawia Ralte chungah lawmthu a sawi a. Pu Vanlalenga, W. Bunghmun chuan Organising Committee aiawhin thusawina a nei a, Pu Lalramzauva, Secretary Organising Committee chuan chuan inbuatsaihna hrang hrang report a pe bawk.

W. Bunghmun khaw kum 113-na  din cham lawmna hun hi Pu H. Lalmalsawma, chuan kaihruaiin thusawi hrang hrang ngaihthlak a ni a, zaithiam leh lamthiam tak tak te nen hun hlimawm tak hman a ni a, Upa H. Laihranga buatsaih Bunghmun khaw sam chu Nunna Lalngaihsakin chhamchhuahna a nei bawk. Tlai lamah  khawtlangin vantlangin ruai nen lawm a nih bakah zan lamah lawmna hi chhunzawm a ni.

W. Bunghmun khua hi Mamit District khawthlang lama awm niin kum 1905 khan Mizo Lalte zinga lar tak Raja Hrangvunga chuan he khua hi a din a ni. Tunah hian in 230 vel an cheng mek a ni.