1218/2022-2023
Aizawl the 12th July, 2022 : Vawiin khan Mizoram State Rural Livelihoods Mission (MzSRLM), Rural Development Department leh Project Management unit, PHE Department te tangkawp in a MzSRLM hnuaia Self Help Group (SHG) leh Village Organization (VO) te tan a an buatsaih ‘Water Conservation Competition’ lawmman semna hun Aijal Club-ah hman a ni a. Rural Development Minister Pu Lalruatkima chu khuallian niin, he hun hi a hmanpui a ni.

Khuallian Pu Lalruatkima chuan tunlai khawvel-ah tuihna humhalh a pawimawh zia sawiin hetiang kawnga inelna MzSRLM leh PHE department ten Self Help Group te tana an buatsaih chu lawmawm a tih thu a sawi a. Khuallian chuan tun dinhmunah MzSRLM hmalakna hi RD Block 26 ah kalpui mek anih thu sawiin Self Help Group Member 72025 an awm mek thu a sawi a. Sorkar in Self Help Group te hi a ngai pawimawh tih sawiin MzSRLM kal tlang in Self Help Group Member ten eizawnna ngelnghet zawk an neih nan leh an eizawnna atana thiam thil hrang hrang an neih nan training pek thin annih thu a sawi a. Heng training te bakah eizawnna atana an hmalakna tur Community Funds a hun takah an lak theih nan, sawrkar pawhin theihtawp a chhuah a, Self Help Group te hnenah a hun takah pek zel thin a nih thu a sawi a. Minister chuan Kum 2020-2021-ah Community Funds Rs 971 Lakhs pek chhuah niin kum 2021-2022 chhungin Community Funds Rs 3152.95 Lakhs pek chhuah a nih thu sawiin heng Community Funds te hi Self Help Group Member tam takin tangkai tak a hmang in eizawnna mumal an neih phah tih a sawi bawk, vawiin a tuihna humhalh intihsiakna a lawmman dawngtu leh thahnemngai taka thawktute chu fakin, an kalzelna turah duhsakna a hlan a ni.

He hunah hian Pu H. Zarzosanga IAS Secretary Rural Development Department leh State Mission Director MzSRLM ni bawk chuan kalkhawmte lawmna thu a sawi a, tun dinhmunah MzSRLM hnuaiah SHG 8294 an awm mek thu sawi in, VO 710 leh CLF 34 din a nih tawh thu a sawi bawk.

Intihsiakna chungchang Report Pi H.Lalchhandami, CEO MzSRLM hnen atanga ngaihthlak niin Er. K. Zohmingliana Project Manager, PMU ,PHE Department hnen atangin ‘Water Conservation and Sanitation’ tih thupui hmangin presentation ngaihthlak a ni bawk a. Er.H.Duhkima, Director, PMU, PHE Department in lawmthu sawina in he hun hi a khar a ni.

He Intihsiakna hi Category hnih, Self Help Group Leh Village Organisation te tan siam a ni a. Self Help Group Category ah Lamkhuang SHG, Rabung, Khawzawl RD Block in Lawmman Pakhatna dawngin, Sawmfang SHG, Kawlkulh Khawzawl RD Block chuan Lawmman Pahnihna dawngin Rebeki SHG, Sanau RD Block in Lawmman Pathumna an dawng thung.

Village Organisation Category ah Hmunzawl VO,Serchhip RD Block in Lawmman Pakhatna dawngin, New Chalrang VO leh Chawngtlai VO, Khawzawl RD Block ve ve in Pahnihna leh Pathumna an dawng thung. Lawmman hian Pawisa fai leh Certificate a keng tel ani.

He hunah hian MzSRLM leh PMU, PHE Department Officials engemaw zat bakah SHG member Block hrang hrang atanga lo kal te telin programme hlawhtling taka hman a ni.