Women & Child Development Department-in Poshan Abhiyan (National Nutrition Mission) Award 2018-2019 a dawn, “Overall Excellence in Implementation” leh “ICDS-CAS Implementation” award a dawn chu vawiin khan Women & Child Development Minister Dr K Beichhua pisaah a lawmna hun hman a ni. 

Department official ten Award dawng thei tura an hmalakna te leh Award la tura an zuk kalna report te pein, hmarchhak state zingah Poshan Abhiyan Award dawng awmchhun an ni chu lawmawm a tih thu a sawi. 

Minister Dr Beichhua  chuan thu sawiin, Award an dawn theih chhan chu Department-a a te ber atanga a lian ber thlenga thawhhona tha a awm vang a ni a ti a, Secretary atanga a te ber thlengin in pawimawh vek a ni tiin an chungah lawmthu a sawi. Minister chuan thlen chin atangin hmasawn zel tur an ni a, tuna chawimawina hi department tan chona thar neih tirtu ni se, Pathian ring chunga thawh zel chuan hei aia ropui zawk pawh hi a la dawn thei a ni a ti.

Women & Child Development Department Director Pi Vanlalpianpuii pawhin thu sawiin, he thil hi Mizoram-in Award a la mai mai lo a ni tih lantir nan nasa zawka min tiphurtu atan hman thiam a pawimawh a, Award dawn theihna atana tha taka an Department thawhpuitu Health Department leh Rural Department te chungah lawmthu a sawi bakah an thawhpuina avanga award dawng thei an ni tih a sawi bawk.

Women & Child Development Department Secretary, Director leh department official te chuan August 23, 2019  khan Union Minister for Women & Child Development Smriti Zubin Irani hnen atangin Award hi an zuk dawng a, heng bakah hian mimal hnathawk tha chawimawina dawng pawh thahnem tak an tel bawk.