2786/2022-2023
Aizawl, 24th November, 2022 : Vawiin khan Mizoram University Multipurpose Hall, Tanhril-ah Agricultural and Processed Food Products Export Development Authority (APEDA), Govt. of India buatsaihin “Workshop cum Buyer-Seller Meet for Export of Potential Agri Products from Mizoram” neih a ni a. Agriculture Minister Pu C. Lalrinsanga chuan khuallian niin a hmanpui a, Commerce & Industries Minister Dr R. Lalthangliana chu khualzahawm a ni.

Workshop hawnna inkhawmah thu sawiin khuallian Pu C. Lalrinsanga chuan APEDA in Mizoramah ngei hetiang hun an rawn buatsaih chu lawmawm a tih thu a sawi a, Agriculture sector a Mizoramin hmasawnna a neih phah ngei a beisei thu leh loneitu te tan hmasawnna kawl eng a thlen ngei a beisei thu sawiin, Mizoramin thlai leh theirah a thar chhuahte hralhna kawngah bung thar kan kai phah a rin thu a sawi a, Prime Minister Narendra Modi-an India ram intodelhna tura a hmathlir ATMANIRBHARAT tihhlawhtlinna tur pawimawh tak pakhat an nih a rin thu a sawi a ni.

Khuallian chuan Mizoram sawrkarin Agriculture sector-ah nasa takin tan a la tih sawiin kuthnathawktute leh sawrkar thawhhona a tha a, a rah pawh kan seng tan mek a, September thla khan New Delhi ah hmarchhak state zinga Agriculture sector-a thawk tha chawimawina Outlook-Swaraj buatsaih “Outstanding North East State Award in the field of Agriculture” kan dawng hial a ni, a ti.

Agriculture lama sawrkarin hmalakna thar a neihte tarlangin khuallian chuan Neihbawi-ah OP-12 Bio Fertilizer Production Unit tunhnaiah hawn a nih thu a sawi a, hei hian tlangram lo neih bansan kawngah awmzia a neih ngei a beisei thu sawiin IFAD-FOCUS project hnuaiah Integrated Farming System kalpui tura hmalak mek a nih thu a sawi bawk a, Lengpuiah Bio-Control laboratory sak mek a nih thu te, Thingdawlah Tissue Culture Laboratory Building sak thuai a nih tur thu te a sawi a, sawhthing, aieng leh hmarcha thar chhuah kawngah nasa taka hmasawn a nih thu te a sawi bawk a ni.

Khualzahawm Dr R. Lalthangliana pawhin APEDA in Mizoramah ngei workshop rawn buatsaih a, Mizoram thlai tharte hralhchhuah kawnga bung thar kai theihna tura Mizoram pawn lam mi hetiang kawnga hma kan sawnpui tur an rawn hruai lut chu lawmawm a tih thu a sawi a. Mizoram chu Myanmar leh Bangladesh in a ri thu sawiin International border kilometre 700 chuang kan ri a, India ram pawn South-East Asia thlengin insumdawntawnna rahka kan ni thei a, India sawrkarin Act East policy a kalpui mekah pawh Mizoram hi an a hmun lailum kan luah thei dawn a ni, a ti a. Myanmar ramri bulah border haat pali sak tur a nih thute leh Bangladesh nen kan inrina lamah Border Trade Centre sak mek a nih thute sawiin Silsury Border Trade Centre sak tura ruahmanna awm tawh chu a pawimawhzia sawichhuakin sawrkar laipuiin hma rawn la thuai se a duh thu a sawi bawk a ni.

Workshop hawnna inkhawmah hian Mizoram chhung hmun hrang hrang atangin entrepreneurs engemawzat an tel a, Mizoram pawn atangin company/corporation hrang hrang mi leh sa an tel a, Dr C. Vanlalramsanga, Economic Adviser, Ministry of Commerce & Industry in workshop buatsaih a nih chhante a sawifiah a ni.

Chawhnu lamah “Role of Stakeholders in Agri Exports from North Eastern Region” tih thupuia hmangin workshop neih a ni a. He hun hi Dr K. Pachhunga, MLA, Vice Chairman, Bamboo Development Board-in kaihruaiin mithiam sawmbikte thusawi ngaihthlak a ni a, sawihona hunt ha tak hman a ni bawk a ni.