Vawiin khan Social Welfare Department buatsaihin ‘Workshop on The Scheduled Tribes and Other Traditional Forest Dwellers (Recognition of Forest Rights) Act, 2006 and Rules, 2008’ chu Social Welfare Department Conference Hall, Laipuitlang-ah neih a ni a. Scheduled tribes leh ramngaw/forest ram chhunga cheng kumhlun hnam te humhalhna leh an chanvo hriatpuina Dan hi 29.12.2006 khan rampum (J&K tel lovin) ah hman turin India ram rorelna sang ber Parliament-ah pawm a ni a. He Dan-in a tum ber chu scheduled tribes leh forest rama chengte an ‘forest rights’ sorkarin a pawmpui leh chhinchhiah sak si lote hnena an chanvo chhinchhiah fel leh pawmpui a ni.

Workshop hawnna inkhawm hi Social Welfare Department Dy. Director Pu Vanlalnghaka Zote-in a kaihruai a. He Act chungchanga thuhmahruai sawitu Social Welfare Department Secretary Pi B. Sairengpuii chuan he Dan hi rampum (J&K tel lovin) ah December ni 31, 2007 atanga hman tan a ni a, Mizoramah chuan December ni 31, 2009 atangin he Dan hi hman ve tan a nih tih a sawi a. He Dan hi sorkar laipuiah chuan Ministry of Tribal Affairs-in a kengkawh a, amaherawhchu Mizoram-ah Tribal Affairs Department a awm ve loh avangin Social Welfare Department chu Nodal Department-ah hmangin, Environment & Forest Department leh Revenue Department te chu line department-ah dah an ni bawk. He Dan hi Tripura State-ah hlawhtling taka hman a nih thu All India Status Report-ah tarlan a nih avangin, State Level Monitoring Committee rawtna angin a hmuna zir chiang turin Social Welafre leh Forest Department officer te Tripura-ah tirh an ni tih thu a sawilang bawk.

Mizoram state chhungah he Dan hnuaia hmalak tawhna thenkhatte chu : 1.) A hmasa berah a bul thuta hma la turin Village Council zawng zawngte chu Gram Sabha thuneihna pek an ni. 2.) Level hrang hrangah Committee hrang a awm vek a ngaih avangin, Sub-Divisional Level Committee, District Level Committee leh State Level Monitoring Committee te din fel vek an ni tawh a ni. State Level Monitoring Commitee hi Chief Secretary Chairman-na hnuaiah din a ni a. Tum 3 lai meeting neih tawh a ni. 3.) The Scheduled Tribes & Other Traditional Forest Dwellers (Recognition of Forest Rights) Act, 2006 leh a kaihhnawih Rules, 2008 te hi Mizo tawnga lehlin an ni tawh a. Copy te pawh a mamawh leh he Dan hrechiang duh te tan a thlawna sem chhuah a ni.

Vawiin Workshop-ah hian Social Welfare, Environment & Forests leh Revenue Department mithiamten he Dan chungchang an zirtir a. SWD Dy. Director Pu Vanlalnghaka Zote chuan ‘Report on Implementation of the Act by Tripura Government’ chungchang a sawi a; Pu Lalduhthlana, ACF, E&F chuan ‘Presentation of the Act & Rules’ chungchang sawiin Pu Dawngkima, Jt. Director, Revenue Dept leh Pu H. Vanlalrawna, OSD, SWD ten ‘Role for Implementation of the Act’ tih thupui hmangin thu an sawi bawk a ni. Workshop hawnna inkhawm ah hian Environment & Forests Department aiawhin Pu Vanlalsawma, Conservator of Forest (Northern Circle) pawh telin he Act chungchang sawihona ah hian hriatthiam loh leh zawhna hrang hrang a hrilhfiah a ni.