Vawiin khan Vanapa Hall ah UD&PA Department chuan khawpui chhung a bawlhlawh paih leh sawngbawl dan zirhona leh  sawrkar nena thawhho dan tur Aizawl khawpui chhunga Village Council, YMA leh MHIP hruaitute veng 52 atanga lo kal te tan a buatsaih. Khuallian Pu Zodintluanga, Minister, UD&PA bakah Pu P.Lianhrima, MCS, Secretary, UD&PA leh Pu P Lalchhuanga, MCS,  Director, UD&PA ten thusawina hun an hmanga, he mi hnu hian mithiam te paper buatsaih ngaihthlakna neih a ni leh a chu chu sawihona in a zui nghal.

Minister chuan Aizawl khaw mipui te chu tunhnai ah khawchhung vawnfai na kawngah nasa takin hma an sawn thu a sawi a. Veng faiber pawh hriat harsa in aizawl veng hrang hrang te chu a fai sawt tawh hle a ni ati. Tunhma zawnga khawpui tawp tak ni  thin kha mipui te inpekna avanga khawpui faizawk leh thianghlim zawk, khawpui hrisel leh chenna tlak a lo ni ta chu a lawmawm hle a ni a ti. Aizawl khawpui in faina kawnga hma a lo sawn deuh deuh na tur in mipui leh sawrkar in nasa zawk an thawho a tul thu a sawi a, Asian development Bank puihna in solid waste management pawh a tih puitlin thuai a ni dawn a ti. Tunah hian Sanitation Rule thar buatsaih mek a ni a, awmze nei zawk a bawlhlawh sawngbawl te pawh a awlsam phah sawt dawn a ni a ti. Hnam hrisel chu hnam hausa an ni a, Mizo te paw'n kan chenna khua te hi khawvela thianghlimber ber te ni thei tur khawp in kan enkawl thei a ni a ti.

Secretary, UD&PA chuan Aizawl khawpui bawlhhlawh paih hna hii kum 1973 atangin motor 2 lekin bul a lo tan tawh thu a sawi a. Tunah chuan nikhat chhung leka  Aizawl khawpui chhunga  bawlhlawh tling khawm  quintal 600 vel lai chu sawrkar, pawl leh mimal ten truck 20 vel paw'n an paih zawh tawh loh thu a sawi.UD&PA in bawlhhlawh thian fai turin motor leh thawktu an neih tam tawk loh avangin mipui leh sawrkar chu an thawh ho a ngaih thu a sawi bawk.Tunah hian Aizawl veng thenkhat ah chuan vantlang, mimal leh sawrkar te thawhhona (public-private partnership mode) in bawlhhlawh hi paih a ni tawh a ni a ti.

Kar hmasa lam khan Aizawl Area chhunga Village Council 61 zinga 54 te chuan khawngtlanga VC leh NGO hruaitu te inkhawm buatsaih in UD&PA Department Agenda 4 an sawi hova thutlukna an siam nghal niin UD&PA Official ten an sawi. UD&PA resolution te chu - 1) Sawrkarin bawlhhlawh paihna senso tum se vengchhung miten bawlhhlawh thenfai hna an thawk thei dawn em?, 2)Private-Public partnership mode hi VC te in an kal pui dawn nge an  veng chhunga NGO te kut ah an dah duh zawk?,3) Vengchhunga bawlhhlawh awm te hi Polythene rawng in anglo pahnih chhungah 'tawihthei' leh 'tawihtheilo' tiin an dah hrang thei ang em?4) Municipal ward pakhat huam chhunga awm te hian  lungrual takin  sanitation area pakhat hnuaiah an awm thei ang em? Heng agenda pali te chungchang a VC 54 te resolution siam tam zawk hi UD&PA department ah thehluh tawh niin official ten an sawi.Vawiin workshop ah hian Pi Maria C.T. Zuali, MCS, Jt Director, ATI, K.Lalthawmmawia,MCS, State Protocol Officer leh B.Vanhlira, Sr.Sanitation Officer ten an paper buatsaih te zirtirna an pe a, hei hi sawihona in a chhunzawm nghal.

Attachment

  • Loading attachment...