April ni 7 khan Industries Minister Pu S. Hiato chu IX World Bamboo Congress, Antwerp, Belgium a tel turin Aizawl a chhuahsan a, April ni 9 khan tluang takin Belgium a thleng.
He World Bamboo Congress neihna hmun Antwerp ah hian April ni 10 khan University hrang hranga mithiam ten Bamboo Research Paper an present a, he khawmpui ah hian Khawvel hmun hrang hrang atangin mithiam leh mi pawimawh engemawzat an tel.
Nimin April ni 11 khan South East Asia ram te tan Investment Meet ropui tak neih a ni a. He Investment Meet, Arif Havash Oebrosano, Indonesian Ambassador to Belgium kaihruai ah hian Meghalaya Chief Minister Dr. Mukul Sangma chu khuallian niin Pu S. Hiato chu khualzahawm a ni thung a. Meet-a an thupui chu ‘WHERE BAMBOO GROWS’ (MAU TONA HMUNAH) tih a ni a, Prof. Dr. Walter Liese, a’n a thuziak a chhiarchhuak bawk.
He inkhawmpui a tel, khawvel hmun hrang hrang atang a kal khawm te hmaah hian Pu S.Hiato chuan Mizoram a Mau that dan leh a hman tangkai dan a sawi a, Mizoram-a lokal a, mau hmanga thiamna sang zawk rawn zirtir tur leh, sumdawnna kawnga thawh ho puiah a sawm a. Mizoram atanga a ken Mizopa kutchhuak ngei, KHUMBEU chu mi pawimawh te a pe a, lawm a hlawh in Mizo kutchhuak an fak hle a ni.
Pu S. Hiato hi Industries Department Joint Director, Pi R.Lalrodingi leh Pu Lalhmachhuana, Asst. Project Manager, Bamboo Development Agency te’n an tawiawm a. Vawiin hian Paris lamah hna pawimawh a kalin, April ni 14 khian ruahman lawk ang chuan Aizawl rawn let leh tura beisei an ni.
