Blood group hmuchhuaktu Austrian Pathologist Dr. Karl Landsteiner piancham June 14 hi World Blood Donor Day atan khawvel pumah kum 2004 atang khan thisen petute chawimawi nan leh thisen pek tulna leh pawimawhna inzirtir nan an hmang thin a. Kumin World Blood Donor Day-ah hian thalaite lam hawiin 'New  Blood For the World' tih chu tlangaupui mek a ni a, thisen pe turin thalaite an sawm a ni.
Mizoramah pawh World Blood Donor Day hi kum 2007 atang khan kum tin hman a ni a. Kumin World Blood Donor Day June 14, 2010 (Thawhtanni) hian MSACS leh AVBD bul tumin Chanmari YMA Hall-ah Chief Secretary Pu Vanhela Pachuau hovin ropui taka hman tum a ni a. Thisen pek runpui (Mass Blood Donation Camp) huaihawt a ni dawn a, damlote nunna chhan nan a thlawna thisen pe turin puitling kum 18-60 inkar thisen pe thei apiangte sawm an ni. Thisen hi Aizawl Civil Hospital leh Presbyterian Hospital Durtlang Blood Bank Officer leh Staff ten an la ang. Zing dar 10:00 atangin a duh apiang tan thisen pek theih a ni ang a, chhun lamah official function leh thisen petute pualin Free Concert neih a ni ang a, zaithiam rual ten nilengin zaiin mipui an awi dawn a, lemchan tawi hmuh nawm tak thlir tur a awm bawk ang.

World Blood Donor Day pual hian Association for Voluntary Blood Donation, Mizoram chuan tlawmngaia thisen lo pe tawh thin zawng zawngte hnenah lawmthu an sawi takmeuh meuh a, thisen petute avangin mihring nunna tam tak chhanhim a ni a, thisen petute hi Nunna chhanhimtu an ni a, an chhuanawm em em a ni. Thisen  pe thin tute tluka Tlawmngaihna Nopui dawm tur hi an awm chuang lo a ni.

Thisen pek hi midangte tanpuina remchang a ni a, Nunna chhanhimna a ni. Mahni vengte mai bakah hmelmate thlenga hmangaihna lanchhuah tirna anih avangin thisen pek hi Buaipui tham, Dampui tham leh Hlimpui tham a ni. Midangte tana thil tha tih hi i hlimpui dawn rau rau anih chuan Thisen pek hi Nun hlim nan lo hmang ve thin turin Association for Voluntary Blood Donation Mizoram chuan an sawm a ni.