Vawiin  14.6.2018 (Ningani) hi World Blood Donor Day a nih angin, AVBD Lunglei buatsaihin chawhma dar 10:30 khan Civil Hospital, Blood Bank Complex-ah hun hman a ni a, he hun  Dr. SR. Ngurchamliana, President AVBD Lunglei & Med.Supt. kaihhruaiah hian khuallian Pu Chalrosanga, MLA chuan a hmanpui a ni.

Pu Chalrosanga, MLA chuan, Mizo thalai ten damlo mangang, a mamawhtute tan a thlawna thisen pek nachang kan hre thar zel hi a lawmawm hle a, theihtawp chhuaha campaign hna thawk thintu AVBD te an fakawm hle a ni, a ti. Thisen hi a thlawna pek a nih angin a thlawna pekchhuah thin a ni a, hetih lai hian kum eng emaw ti lai atang khan thisen a thianghlim leh thianghlim loh test na chi hrang hrang man Rs 550/- lak a ni ta a, hei hi tute emawin thisen man tizawnga sawi a awm thin avang leh thudik tawk lo thehdarh avangin, mi thenkhatin thisen pek kawnga tim phah an awm leh voluntary-a thisen pek kawnga kan tlahniam ta deuh hi thil pawi tak a ni a, damlo mangang te kan tanpui theihna hlu ber chu an tan thisen kan pek hi a ni a, chuvang chuan voluntary-a thisen pek kawngah theihtawp i chhuah thar zel ang u, tiin kalkhawmte a sawm a ni. Pu Chalrosanga hian Civil Hospital Blood Bank-a thisen petu ten tangkai taka an hman turin Water Cooler tha tak a pe bawk.

He hun kaihruaitu Dr. SR. Ngurchamliana chuan, thisen hi ni 120 chiah a dam a, insiam thar zel a ni a, chuvang chuan midangte nunna chhan nan thisen unit khat 350 ml vel thla thum dana pek hi kan intihhmuh a, kan uar deuh deuh a pawimawh takzet a ni, a ti.

Report - H. Lalthangliana, Secretary AVBD Lunglei hnen atangin ngaihthlak a ni a, World Blood Donor Day denchhen hian Civil Hospital Blood Bank-ah thisen pek runpui neih chhunzawm nghal a ni bawk.

He hunah hian mimal tlawmngaia thisen pe tam leh Pawl anga thisen pe tam te hnenah chawimawina thilpek hlan an ni a, 14th June, 2016 - 13th June, 2018 chhunga thisen pe tam chawimawina dawngte chu mimal vawi 6 pe tling chin: Hamlet Lalrinkima, Rahsiveng leh R. Lalrochama, Bazar Veng te an ni. Pawl anga thisen pe tam chawimawina dawngte leh thisen an pek dan dinhmun hetiang hi a ni.

Church Based :

1st Mizoram Thalai Kristian Pawl - Unit 2347

2nd Adventist Youth Fellowship - Unit 124

3rd Dist. Pentecostal Youth Deptt. - Unit 65

NGO Based :

1st Serkawn Br. YMA - Unit 67

2nd Pukpui Br. YMA - Unit 63

3rd Peniel Hnahthial Br. YMA - Unit 61

Institution Based:

1st NSS Govt. J. Buana College - Unit 222

2nd Baptist HSS - Unit 215

3rd NSS Govt. HSS - Unit 194

Others Base:

1st Pachuau Inpui Group - Unit 25

2nd 800- Black Bumpers - Unit 20

3rd MZI Lunglei Hqrs. - Unit 11

3rd Buarpui Welfare Lunglei - Unit 11