Khawvel hmun dangte ang bawkin kawng hrang hranga naupang tihchhiat danna/khapna Ni ‘World Day for Prevention of Child Abuse’ chu vawiin khan Mizoram-ah pawh hman a ni a. Aizawl bakah Lunglei, Saiha, Lawngtlai leh Ngopa-ah te pawh he Ni hi tlawmngai pawl hrang hrangte huaihawtin urhsun taka  hman a ni. Aizawl-ah chuan naupangte hamthatna lama thahnemngai taka thawk thin tlawmngai pawl Centre for Peace & Development (CPD) chuan Millenium Centre kawt atanga Chanmari YMA Hall thleng naupang khuaikhem/tihchhiat duh loh entir nan kawngzawh a huaihawt a, NGO hrang hrang MHIP leh Human Rights & Law Network, Social Welfare Dept aiawhte leh sikul naupangte thahnem takin he Anti-Child Abuse March ah an tel a ni.

 

 

World Day for Prevention of Child Abuse pual inkhawm Chanmari YMA Hall-a neih ah Khuallian Parliamentary Secretary Pu Lal Thanzara chuan thu sawiin naupangte chanvo humhalh tura inpungkhawm chu Pathian duhzawng tak a ni ngei ang, a ti. Mizote chu naupang chunga nunrawng thin tak, naupangte chungah ngilnei leh hriatthiamna thui zawk put chu hnam ang pawhin zir kan tul hle a, Kristian nunphungah naupang ngaihsak chu a pawimawh hle a ni, a ti bawk. Child abuse awmna chhungkua emaw hmun kan hria a nih chuan thuneitute hnena hrilh chu kristian leh khua leh tui tha kan nih anga kan tih makmawh a ni tiin Pu Lal Thanzara chuan kalkhawmte a chah a ni. Kristian chhungkua atangin bul tan an tulzia sawiin Khuallian chuan Mizoram sorkar leh mipuiten kawng hranga hmalakna/hmasawnna hlawhtlinpui tak tak tur chuan Pathian rin a, dik tak leh taima taka thawh a pawimawh hmasa ber a ni, a ti.

Child Welfare Committee Chairperson Pi Lalengruali pawhin thu sawiin khawvel hnam fing apiangin naupangte hlutna hriain chhungkua leh khawtlang ah te pawh dah pawimawh nachang an hria a ni, a ti a. Tun atanga reilote-ah Integrated Child Protection Scheme (ICPS) pawh Mizoramah hman tan a nih theih tur thu a sawi bawk. September 2005 atanga October 2009 chhunga naupang khuaikhem/tihchhiat/sawisak registered case 328 a awm tawh thu sawiin Pi Engruali chuan hetiang pawisawi lo naupangte venhimna kawngah nu leh pa leh zirtirtute an pawimawh ber a ni, a ti.

Social Welfare Dy. Director Pi Aileen Vanlalzawni chuan sorkarin naupang a ngaipawimawh hle a, Social Welfare Dept. chuan theihtawp a chhuah zel tur thu te, khawtlang te nena tangkawpin naupang enkawl leh venhimna hna chu a hlawhtlin zel a beisei thu a sawi a. Naupang pual bil Dan Juvenile Justice (Care & Protection of Children) Act, 200 and its Amendment Act, 2006 hman thuah Mizoram chu India hmarchhak bialah a hmang hmasa ber dawttu a ni a, JJ Act hnuaiah chuan Juvenile Justice Board, naupang dan nena inremlote chungthu ngaihtuahtu leh naupang venhim leh enkawl ngaite hamthatna ngaihtuahtu Child Welfare Committee te chu tihtakzetin state dangte entawn thamin an thawk a. Dan phalnaa naulak Legal Adoption hlawhtling taka kalpui niin naupang baihvai engemaw zat tan chhungkua siamsak a ni tawh bawk a ni, a ti.

Child Rights Activist Pi Vanramchhuangi pawhin thu sawiin Mizoramah englai pawhin naupang ten kawng hrang hrangah tihduhdah, tihnawmnah leh hlamchhiah an tawk reng a, nu leh pa tena an hnawl naupang khungkhawmna hmun Orphanage leh Home hrang hrangah naupang sangtel an awm a. Chhungkaw neih hi naupangte dikna chanvo a ni, a ti. Mizoramah naupang, tihpalh lova midang kut tuara thi 8, mahni intihlum 2 leh rukbo 1 an awm thu sawiin Pi Vanramchhuangi chuan naupang rilru thianghlim, inngaihtlawmna leh lawmnaa khata nun an neih theih nan theihtawp chhuah zel ang u tiin kalkhawmte a sawm a ni.

Vawiin World Day for Prevention of Child Abuse puala inkhawmah hian Khuallian Pu Lal Thanzara chuan kawngpui dungah hemi lam hawizawng thu tar tur Hoarding a hawng a, Community Volunteers ti tha zualte hnenah lawmman a sem nghal a ni. Mizoram naupangte tana thahnemngai taka thawk tura intiamna Pledge leh Hunserh chu Rev Lengluta’n a hmang a. Naupangte hamthatna tur kawng hrang hrang sorkar hnena thehluh tur Resolution pawh vawiin khan pass nghal a ni bawk.