2210/2025-2026

14th November, 2025 : Vawiin dar 10:30am khan National Health Mission, Health & Family Welfare Dept. hnuaia programme pakhat National Programme for Prevention and Control of Non-Communicable Diseases (NP-NCD) hmalakna in Khawvel pum huapa hman thin ‘World Diabetes Day 2025’ chu Recreation Hall, 1st Batallion MAP, Armed Veng, Aizawl-ah hman a ni a. Hemi pual hian 1st Batallion MAP te hriselna endik nghal a ni.

World Diabetes Day Programme hi Pu Saidingliana Sailo, Dy. Commandant, 1st Batallion MAP in kaihhruaiin kalkhawmte lawmna leh chibai bukna neiin 1st Batallion MAP hmuna hman a ni leh an hriselna a thlawna endik sak a ni chu lawmawm a tih thu a sawiin hriselna lama tan lak an ngaihthu a sawi.

Dr. Lalawmpuia Chhangte (Diabetologist), State Nodal Officer, NUHM in kumin World Diabetes Day thupui ‘Diabetes and the work place’ tih chu thiam tak leh ngaihnawm takin a sawi a. Diabetes natna sawifiahna neiin a enkawl dan leh inven dan tur te sawiin 1st Batallion MAP staff zawng zawng te chu ram, khawtlang leh mipuite venghimtu an nih avanga an hrisel that a pawimawh thu leh an hriselna ngaipawimawh turin an chah a. World Diabetes Day hi November ni 14 hian khawvel pum huapa hman thin a ni a. Mizoramah pawh National Health Mission (NHM) hnuaia National Programme for Prevention and Control of Non-Communicable Diseases (NP-NCD) hmalaknain he ni hi kawng hrang hrangin hman a lo nih tawh thin thu a sawi a. Mizoram mipuite hriselna tha zawk an nei zel theihnan National Health Mission, Health & Family Welfare Dept. in theihtawp chhuaha hma a lak zel thu a sawi.

Ministry of Health and Family Welfare, Govt. of India atanga lehkha lokal bawhzuiin November ni 7 ‘National Cancer Awareness Day’ puala Cancer natna chungchang leh a inven dan tur Dr. Martin Chawngsailova, State Programme Coordinator, NP-NCD hnen atangin ngaihthlak a ni.

Day pual programme hman zawh hian 1st Batallion MAP thawktute thahnemtak te BP, Blood Sugar leh Body Mass Index (BMI) a thlawna check sak vek an ni.