No.824/2021-2022

Dated Champhai, the 5th June, 2021: Khawvel hmundang rualin vawiin khan Champhaiah 'Ecosystem ngai awh leh tura siam thar lehna (Ecosystem Restoration)' tih thupui thlan hmangin World Environment Day hman a ni. He ni pual hian Champhai Forest Division & Champhai Forest Range Staff-te chuan DFO Champhai Pu Lalduhthlana hovin Forest Nursery, Mualzen ram Champhaiah thingphun hnatlang an nei.

Pu Lalduhthlana chuan World Environment Day chu kan chenna khawvel mother nature chhe zel tur ven himna kawnga mimal, pawl leh sawrkar ten kan pawimawhna lantira, awmze nei leh tangkai taka hma kan lak thinna tura hman thin a ni, a ti a. Kumin atana thupui thlan chu United Nations chuan kumin atan duhtawk mai lovin, kum 10 chhung lo awm tur 2021 atanga 2030 thleng awh tur UN Decade for Ecosystem Restoration atan a puang hial tawha, UNEP, FAO leh WHO te nena thawk hovin hma chak taka lak mek a ni, a ti bawk.

DFO Champhai chuan Ecosystem tuaithar tur chuan ram, lui leh dil te amaha indin thar leh tura tih buai loh a, mamawh ang zela enkawlna pek a kawh ber thu leh, a tum ber chu ecosystem tlu chhe tawhte, tlu chhe mekte leh dinhmun him zawka la awmte chhanchhuah leh vawnhim kawnga hmalak a nih thu a sawi a. Ecosystem tha zawk chuan ram ngaw tha zawk, nungcha tam leh hrisel zawk, tui thianghlim leh boruak thianghlim hniangnar zawk, lei tha tam zawk, sik leh sa mumal zawk, ei leh bar hnianghnar zawk, boruak thianghlim leh nuamte a chhawpchhuak thei dawn a ni, a ti bawk.

United Nations chuan June ni 5 hi kum 1972 khan World Environment Day atan a lo puang tawh a. Kum 1974 atangin he ni hi urhsun zawka hman tan niin, 1987 atang khan kum tin thupui bik neia hman thin a ni.

Vawiin World Environment Day, 2021 pual thingphun hnatlangah hian Forest Department-a thawktu mi 35 an tel a, thing tiak 150 - Herhse, Ngiau, Theihai, Ashoka tree, Bung, Rihnim, Zawngtah leh Thakthing te an phun a ni.