680/2023-2024

Aizawl, the 5th June 2023 : Vawiin khan Mizoram Pollution Control Board (MPCB) buatsaihin Dawrpui Multipurpose Centre-ah World Environment Day (WED) 2023 lawmna hun hman a ni.

MPCB-a Environmental Engineer (E.E) Pi PC. Lalmuanpuii’n kaihruaiin EF&CC Department atangin Pi Lalrammawii Sailo (IFS), Conservator of Forest (CC) chuan khuallian niin a hmanpui a ni.

Khuallian chuan World Environment Day hi hman dan chi hrang hrang a awm a, a tangkai theih dan ang bera hman chhuah tur a ni tiin a sawi a. Kan ram hruaitu hmasate pawh khan an ngai pawimawh hle a, vawiini thleng ruahhmannate pawh an la siam chho reng a ni. Beat Plastic Pollution tih theme hi vawihnih kan hmanna a ni ta a, hman nawn ngai tawh lo tura plastic bawlhhlawh tihtlem hi kan tum ber tawh tur a ni a, kan chhehvela cheng ramsate leh luia cheng nungchate pawhin tuarin an thih phah nasa hle a, mihringte thlengin kan hriselna a tichhia a, kan thihpui nasa tawh hle a ni tiin a sawi. Energy rem chungchangah pawh hma kan lak thar a ngai a, sum leh pai renchem nan pawh kan mamawh hle a, hote anga lang tui ren te, electric ren te, ke-a kalte leh ruahtui khawl thatte hi a pawimawh hle a ni tiin a sawi. Sarang leh polythene lam vawikhat hmana kan paih nghal mai chite hi hman tawh loh tur a ni a, sawrkar phal tawh loh thil a nih bakah kan khawvel tichhetu an ni tih hre nawn leh turin mipuite a chah a. Environment humhim nana man tlawm ber pawl thing phun uar deuh deuh hi a pawimawh hle a ni tiin a sawi bawk. Khuallian hian NIT Mizoram leh Mizoram Pollution Control Board-in Waste Reduction Hackathon an buatsaih tur a hawng nghal bawk.

MPCB hian World Environment Day hi May thlatir atang khan Mission LiFE hnuai atangin an hmang chho reng tawh a, Awareness Campaign leh Mass Cleaning Drive-te neiin District hrang hrangah hun an lo hmang tawh a, competition pali lai buatsaihin Photography Competition, Exhibition on Waste to Wealth Competition, Painting Competition leh Online Quiz Competition-te a ni a, heng competition-a tithate hnênah vawiin WED lawmnaah hian pawisa fai bakah Certificate hlan nghal an ni.

Vawiin WED lawmnaah hi Department hrang hrang hotute leh zirlai thahnem takin an hmanpui a, Mission LiFE programme hnuaia National Level Hackathon on Waste Reduction hman tura an hmachhawp mek chu National Institute of Technology (NIT)-a Associate Professor Dr. H. Lalhmingsanga’n sawifiahin hun a hmang a, kal khawm zawng zawngte hian environment tichhe lo tur leh humhim turin thu intiamkamin (pledge taking) hun an hmang bawk a ni.