Khawvel pumin nimina World Environment Day an hmang chu Aizawl ah pawh  5.6.2010  chawhnu khan Vanapa Hall-ah Environment & Forest Dept. hnuaia Green Mizoram Society in a buatsaih World Environment Day 'Green Concert' chu hman a ni a. E&F Minister H.Rohluna chu khuallian a ni.

Khuallian Pu H.Rohluna chuan vawiin ni hun duhawm tak khawvel dang ruala kan hmang ve thei chu Chief Minister Pu Lal Thanhawla chuan Mizo mipuite hnena a duhsakna message a rawn thawn thu a sawi a, Thuchah a rawn thawn ah chuan Chief Minister chuan World Environment Day kan hman ah hian Mizoram mipuite  duhsakna a hlan a, kan ram boruak sik leh sa, nuam tak hi hmasawnna kawng hrang hrang a ke kan pen naah hian kan ti chhe tur a ni lovang, a ti a.India khua leh tui kan nihna angin ram danpui(constitution)-in tih tur min phut zingah chuan kan ramngaw leh a chhunga cheng nungphung hi kan dimdawiin kan humhalh tlat tur a ni tih i hre thar leh theuh ang u tiin, he world environment day ah hian mahni theuh inbihchiang ila, engkim kan tih hi ram leh hnam tan a ni tih i hre thar leh ang u a ti a ni.
                               
Khuallian Pu H.Rohluna chuan hetianga hun tha kan nei hi kan vannei hle a ni tih kan hriatthar a tul a ni tiin, hun lo kal zel turah kan ram neih chhun hi tuchhuan thlenga chenna tlaka kan siam theihnan tan kan lak a, a chhunga awm zawng zawng hi kan humhalh tlat a, kan vawn nun tlat hi mitin mawhphurhna a ni tih i hre thar leh ang u tiin kal khawmte chu a chah a ni.
                                 
Vawiin Green Concert a programme ah hian Pu Lalrinmawia Ralte, Parliamentary Secretary chu Khualzahawm a ni a,Thusawina hun a hman bakah Poetry composition competition a lawmman la te hnenah lawmman a sem a, khuallian Pu H.Rohluna, Minister chuan slogun leh quiz competition a lawmman la te hnenah lawmman a sem bawk a ni.

Green Concertah hian Mizo zai thiam tak tak thahnem takin mipuite zaiin an awi a ni.