Vawiin khan Agriculture Conference Hall, Aizawl ah World Food Day vawi 39-na hman a ni.

World Food Day hmanna ah hian Agriculture Director Pu Rohmingthanga Colney chuan buh a Mizoram a intodelh theihna turin hmalak mek a nih thu a sawi a, tunah hian Mizoram chhunah buh chinna turin leilet leh terrace siam thar mek a nih thu leh hun rei tak hman lova awm tawh leilet te chei that mek a nih thu a sawi a. National Food Security Mission (NFSM- Rice) hnuaiah buh tam zawk Mizoram in a thar theih na atan hmalak mek a ni a ti.

Pu Rohmingthanga Colney chuan Mizoram ah hian kut hnathawka eizawnna tan turin hmun tam tak ala awm thu a sawi a, loneitute'n khawl hmanga hna an thawh theihna turin Agriculture Department chu zau takin a in hawng a ni a ti.

Pi Zothansangi Sailo, Jt.Director, Agriculture Department chuan he hun hi a kaihhruai a, Pi Vanlalpianpuii, Director, Women & Child Development Department leh Pu R.Vanlalchhunga, Assistant Plant Protection Officer, Agriculture Department te pawhin ei leh bar hrisel pawihmawh na te an sawi bawk.

Food and Agriculture Organization (FAO) bultumin khawvel hmun hrang hrangah World Food Day hi thupui hrang hrang neia hman thin a ni a, vawiin ah hian " Kum 2030- ah chuan riltamna awm tawh lo" tih thupui hmangin hman a ni.