Vawiin chawhma khan Pi Sangchhin Chinzah, Deputy Commissioner, Kolasib District pisa ah District Level Coordination Committee under National Programme for Prevention and Control of Deafness te chuan thutkhawmna hun neiin March ni 3, 2020 a ‘World Hearing Day’ a National Hearing Awareness Campaign, Kolasib district a hman dan tur an rel.

Pi Sangchhin Chinzah chuan Kolasib district chu State dangte nen a ramri thui tak intawm kan nih avangin hriselna kawngah pawh district dangte aia tan kan lak nasat a tul thu a sawi a, ‘World Hearing Day’ pual a a thlawn a beng lam entirna Kolasib District Hospital a buatsaih tum a ni chu lawmawm a tih thu a sawi. Deputy Commissioner chuan Kolasib District Hospital a Pure Tone Audiometry, beng lam endikna khawl awm chu mipui tam zawk ten tangkai tak a an hman theih nan inhrilhhriatna tha awm thei se a duh thu a sawi bawk a ni.

Vawiin thutkhawm ah hian kum dang a World Hearing Day hman dan tlangpui te sawi ho a ni a, Kolasib district Hospital-a beng lam enkawlna khawl awm te sawi zauna neih a ni bawk. Ni 3, March 2020 chawhma dar 10:30 hian District Medical Superintendent Conference Hall, Kolasib ah World Hearing Day lawmna hi hman tur a ni dawn a, Hearing instructor te atangin beng enkawl dan inzirtirna ngaihthlak a ni dawn bawk a ni. A thlawn a beng entirna hun hi tlai dar 3:00 thleng a awm dawn a, a duh apiang tan he hunah hian a inentir theih dawn bawk a ni.