UNO rawt angin khawvel puma Malaria do Ni chu vawiin khan Aizawlah pawh hman ve a ni a, a puala inkhawm I&PR Auditorium-a buatsaihah chuan Health Minister Pu Lalrinliana Sailo khuallian niin State Level Seminar -a titha te hnenah lawmman a hlan a ni.
World Malaria Day hi kum 2008 atang khan khawvel hmun hrang hrangah hman tan niin Mizoram chuan a vawikhatna atan vawiin hian a hmang ve a, inkhawm hi Dr P. Sangzuala, State Public Health Consultant in a kaihruai a ni.
Malaria do ni hmanpuitu Health Minister chuan Mizoram chhungah sikserh natna hi tirem vek thei rih lo mah ila a dona kawngah erawh chuan nasa takin hma kan sawn a ni, tiin sorkar-a a luh hlimah Malaria vanga thi zat mi 119 lai ni chu tunah chuan 31-ah a tlahniam tawh a ti. Minister chuan sorkar laipuiin hriselna kawng hrang hrang atana Programme lian tham tak tak a duan kenkawh kawngah Mizoram chu a titha pawl tak a nih dan a tarlanga. Kum 2010 khan hmarchhak State zinga NRHM kalpui tha ber kan nih thu te, 2011-ah India ram State tenau zinga lawmman dawng pha kan nih leh thu bakah RSBY-ah pawh Mizoram chuan thawh that lawmman a dawn thu a sawi a. Ayush lamah pawh tunah hian Mizoram chu thawk tha lawmman dawng mai thei dinhmunah a ding nia a hriat thu a sawi a ni. Amaherawhchu hetiang dinhmun atang hian hmasawnna tur tam tak a la awm thu sawiin Pu Lalrinliana Sailo chuan thawktute inpekna leh tanlak chhunzawm zel a tul thu a sawi a. Sorkar laipui ruahman anga Account Clerk thahnem tak lak te pawh CMO tam zawkin an hmang tangkai duhlo erawh hi chu in enfiah a tul a ni, a ti.
Vawiin inkhawmah hian Director of Health Services, Dr. Ramfangzauva chuan thuhma sawiin Mizoram chhunga Health Department hmalakna zingah Malaria, Cancer leh HIV do te chu hautak zualpui an ni, a ti a. Malaria bikah erawh chuan mipui te tawiawmna leh thawhpuina avanga hlawhtlinna thui tak innghat a nih avangin sorkarin thosi kah beihpui a ruahman te, thosi len sem leh thisen entir zawng zawng te tawiawm turin mipui te a sawm a ni.
Malaria do ni puala State Level Seminar buatsaih chu nimin khan zawhfel a ni a. Heta titha zual pathum vawiina Minister-in lawmman a hlan tak te chu - pakhatna C. Vanlalrempuii, Home Mission School; pahnihna Lalrinmawii St Paul’s Hr. Sec. School leh pathumna Lalrintluanga, Govt Diakkawn High School te an ni.
