Vawiin khan Zemabawk YMA Hall ah World Oral Health Day hman a ni a, Health Minister Pu Lalrinliana Sailo chuan khuallian niin he hun hi a hmanpui.

Health Minister chuan kumtina hman thin World Oral Health Day chu tangkai taka hman zel tha a tih thu sawiin, Mizoramah Oral Health, ka chhung vawn fai kawngah tan lak leh zualna tur hmabak thui tak a la awm a ni, a ti. Zuk leh hmuam tih nasat avangin ka chhung Cancer an tam phah hle a, taksa lamah pawh nghawng thalo tak a neih avangin hriselna lama inenkawlna senso pawh a tam phah hle a, hemi kawngah hian nasa lehzual zawka tan lak a ngai a ni, a ti a. Taksa leh hriselna atan zuk leh hmuam a pawizia hriaa sim tur leh a la ching velo te pawhin tihloh nachang hre turin Health Minister Pu Lalrinliana Sailo chuan mipuite a chah a ni.

He hun hi Dr.Biakhmingthanga, Indian Dental Association, Mizoram Branch kaihhruaiah hian Dr.Vanlalhuma, Consultant Oral Health in lawmthu a sawi a. Inkhawmna neih zawh hian a thlawna inentirna, Free Dental Clinic neih nghal a ni. He clinic-ah hian Doctor 30 vel in an buaipui a, damdawi te a thlawna sem nghal niin ha phawi, hnawh te pawh a thlawna tih nghal vek a ni. He clinic ah hian damlo 560 vel en hman a ni a, mi engemawzat ha phawi leh hnawh te tihsak a ni bawk.

Health Minister hian Oral Health day a hman zawh hnu hian Zemabawk a Cancer Hospital a tlawh nghal a. He Daycare Cancer Hospital ah hian khum 10 a awm a, chemotherapy nitina la thin damlo 20-30 awm ziah ang a ni a, damdawiin an vawn faina kawngah Health minister pawh a lawm hle. Minister hian patient te tlawh nghal in an harsatna te a ngaihthlak sak bawk. Hemi zawh hian October thlaa luah theihtura beisei, Cancer Hospital night care khum 10 awm theihna tur a tlawh nghal a ni.