Khawvel puma TB Dona ni atan ruat a nih angin vawiin March ni 24, 2014 khan Revised National TB Control Programme (RNTCP) bultumin World TB Day chu hlawhtling tak a hman a ni. Vawiina World TB Day hmanna hun hi thawh hnih a hman a ni a.

A thawh khatna hi Vanapa Hall-ah hman niin he hunah hian Aizawl Thunder ten World TB Day pual Bike Rally an neih chu Dr. K.Ropari, Director, Health Services in a vailiam.

Thawh hnihna hi vawiin chawhnu khan I&PR Auditorium-ah neih a ni a. He hun hi Pu R.L. Rinawma, IRS, Principal Secretary, H&FW chuan khuallian niin a hmanpui. He hunah hian Dr. Lalrinliana Sailo, Principal Director, HFW chuan kalkhawmte lawmna thu a sawi a. Dr.Vanlalhruaii, State TB Officer in RNTCP chungchang leh kalphung kimchang sawifiahna hun powerpoint presentation hmangin a entir a. TB dona hla Rosy K.Remsangpuii sak Music video chu khuallian Pu RL Rinawma'n a release bawk. He hunah hian TB Vei dam leh bakah Cat-IV petu hnen atangin thu tawi sawina hun hman a ni leh a, kal khawmte tana quiz buatsaih a nih bakah zaithiam ten hun an hmang bawk. Tin, TB Officer lo ni tawh, hnathawk tha thlan chhuah, Dr. Gordon Zohmingthanga, Dr. Malsawma, Dr.Rotluanga te hnenah chawimawina hlan an ni.

Pu RL Rinawma chuan TB Dona kawnga thawktute fuihna thu sawiin tihdam hna zahawm zia leh thawktute fakawm a tih thu te a sawi a. Chak zawka hmalak a tul zia leh media lam-ah te uar zawka tan kan lak a ngaih thu te, mipuite zinga Awareness neih tam a tul zia te sawi langin Mizo ramin Medical College thar nei tura Central lam nen MOU kan sign ve tak thu te, He kan Medical College neih tur hi a theihna chin chinah World Class Medical College anga kalpui tum a nih dan te a sawi bawk. TB Natna hi Kum 1882-ah German Doctor Robert Koch-a'n hmu chhuakin India ramah hian TB Dona Programme hi kum 1997-ah kalpui tan a ni a. Mizoram-ah hian kum 2003-atangin Programme kalpui tan a ni. RNTCP Report-in a tarlan danin India ram hi khawvela TB vei tamna ber ram a ni a. 2013 Record-in a tarlan danin TB Damlo register zat hi mi 2005 an ni a, Khak a TB hrik hmuh zat hi 706 niin tihdam zat hi mi za-a sawm riat pariat (88%) an ni. TB vang thi hi 63 an awm bawk.

Dr. R.Lalbiakkima, Director, Hospital & Medical Education chuan lawmthu sawina hun hmangin hun hnung a khar a ni.