Kum danga tih thin angin Mizoram Bharat Scouts & Guides te chuan vawiin chhun khan Aizawl Vanapa Hall-ah World Thinking Day an hmang a. Home Minister Pu R. Lalzirliana chu khuallian a ni.

Home Minister chuan thusawiin Lord Baden Powel in Scouts & Guides Movement a din chhuah dan tlangpui a tarlang a. Baden Powel-a leh a nupui te piancham February 22 chu kum 1926 atang khan Scouts & Guides Movement ten inhlan tharna ni Thingking Day ah an hman thin dan chhuichhuakin vawiina he ni hmangtute zawng zawng hnenah mahni mihring pui midangte tana malsawmna thlentu ni turin a chah a ni.  Pu Lalzirliana chuan kumina World Thinking Day thupui ‘Retheihna hi tanrualna hmangin kan ti bo thei a ni’ tih chu naupang rethei leh eitur nei lo kumtin mi 30000 thi ziah leh ei tur nei lo a vaibelchhe tel awm thinte chhanchhuak tur hian thawh theih kan nei a ni a ti a. Tunhnaia Haiti rama lirnghing tuartute zingah naupang tanpui ngai thahnem tak an awm thu te sawiin kan mihring puite tana thil chhete tal tih chu he ni thupui hi a ni a ti.