March ni 22 hi khawvel pumah World Water Day a nih angin, Aizawl-ah pawh PHE Department chuan ‘Siktuithiang Kut 2012’ tih hming vuahin vawiin khan Vanapa Hall-ah he Ni hi an hmang a, kumina thupui chu ‘The World is Thirsty, We are Hungry’ tih a ni.

Mizoram State Planning Board Vice-Chairmam Pu Lalkhama, IAS (Rtd) chuan he hun hi hmanpuiin tui hnar humhalh a pawimawhzia te, ti bawlhhlawhtu aia ti faitu nih a tangkai ziate leh tui renchem a tulzia te a sawilang a ni.

Pu R. Lalfanliana, Engineer-in-Chief, PHE Department chuan Siktuithiang Kut 2012 in a tum ber chu tui thianghlim hnianghnar taka nei bakah chaw tha leh hrisel a pawimawhzia pholan a ni, a ti a, Khawvelah mihring tluklehdingawn 7 vel kan awm a, kum 2050-ah chuan tluklehdingawn 9 vel awm tura chhut a ni. Mi pakhatin nitin tui thianghlim litres 2-4 a mamawh a, mi pakhat nitin kham khawp ei tur thar chhuak turin tui litres 2000-5000 lai mamawh tihna a ni. Tui mamawhna hian san lam a pan zel a, khawvel hi a tuihal tawh tak meuh meuh a ni, a ti. Ei leh in piah lamah, tui thianghlim hi hriselna bulpui, faina leh thianghlimna nena inkungkaih tlat a ni a, tui bawlhhlawh erawh natna thlentu a ni thung. Khawpui a lo thangin mihring kan pung zel a, kan tui hman a tam chho tial tial a, hnianghnar leh rualkhai taka tui kan dawn theuh theih nan sorkar leh mipuite tanrual a pawimawh hle a ni a ti.

He hunah hian CCDU, PHE Department buatsaihin intihsiakna chi hrang hrang : Lemziak intihsiakna, thlalaka intihsiakna, SMS-a intihsiakna an buatsaiha tithate lawmman sem a ni bawk. Pachhunga University College leh Government Aizawl College ten ‘Ruahtui hi kan hmang tangkai tawk a ni’ tih thupui hmangin debate an nei bawk.

Siktuithiang Kut 2012 programme hi zing kar atanga tan a ni a, Aizawl Thunders-ten Motorcycle rally neiin Aizawl khawpui an tuam a. Mizo Higher Secondary School leh St. Paul’s School naupangten ‘Walk for Water’ tih thupui hmangin kawng an zawh bawk a ni.