Vawiin chawhnu khan Aizawl District Football Association (ADFA) leh TT Royte Group á¹­angkawpin an buatsaih Xtech Necs Cup 2018 final chu AR Ground, Aizawl-ah khelh niin, Chanmari Local council leh Ramhlun South Local council te inhmachhawn in, Ramhlun South tan Jersey number 10, R. Lalthanmawia'n goal thun in 1-0 in hnehna an chang.

He hunah hian I&PR Minister Pu Lal Thanzara chu Khuallian niin, Pu Robert Romawia Royte, President ADFA, TT Royte group aiawh te bakah entu mipui thahnem takin an telpui bawk.

Khuallian Pu Lal Thanzara chuan, ADFA ten khua leh vengte tan football a inelna changtlung tak an buatsaih thei chu lawmawm a ti a, football lama hma kan sawn nan a NECS ten mahni insengso a hma an la thin chu lawmawm a tih thu a sawi. Inter Village football inelna chu kan mizo thalaite talent haichhuah nan hmang turin a duhsak thu a sawi a, district hrang hrangah khelmual tha siamin artificial grass phah mek anih thu a sawi bawk. Heng khelmual-te hi hmang tangkaia, infiam mi tha tak tak chherchhuaka, thalaite tan eizawnna tha anih ngei a beisei thu a sawi a, MFA in mahni puala football training-na hmunpui tur Sairang Dinthar-ah a ruahman chu a rang lama kan chhawr thuai theih a beisei thu a sawi bawk.

Xtech Necs Cup 2018 ah hian team 73 an tel a, Aizawl khaw chhung atangin team 50 telin Aizawl pawn atangin team 23 an tel bawk a ni. Champion team Ramhlun South Local council hnenah pawisa fai cheng nuaikhat leh singnga bakah TT Royte industry siam ita (Brick) trip khat hlan an ni a, lawmman pahnihna latu Chanmari local council hian cheng singriat an dawng bawk a ni.