Central YMA General Conference vawi 66 na Kolasib-a thlaleh October 25 - 27 chhunga neih tur chungchangah Organising Committee Chairman Transport Minister Pu P.C. Zoram Sangliana hovin vawiin khan ama office ah committee neih a ni.

Committee kaihruaitu Transport Minister chuan tun tum General Conference neih tur chu Conference zawnga nuam leh hlimawm, tha ber leh thianghlim ber anih theih nan thawh ho that a duh thu a tarlang hmasa a. Palai leh khawmpui chhimtute tan pawh nuamsa taka an thlen leh veivah theihna tur ruahman a pawimawh thu a sawi a ni. Pu P.C. Zoram Sangliana chuan Kolasib atanga member lokalte leh department hrang hrang aiawh te hnenah an mamawh leh an hmalakna te tlang taka sawi tura sawmin thawhhona tha tak nei turin a chah a ni.

Vawiin committee ah hian conference thlenna tura sum ruahman zat cheng nuai 25 tun dinhmuna la tlin loh chungchang sawi a ni a, budget ruahman tlin tura tanlak zel a tul thu bakah sub committee hrang hrang hmalakna te ngaihthlaka sawiho zui nghal a ni a.  Conference ah hian YMA member pungkhawm an nih ang ngeia a Mizo thei ang bera thawmhnaw in bel an duh thu leh a bikin hmeichhiate pawhin kekawrtlawn ha lo in puan bih ngei thei se an duh thu tarlan a ni a. Zu leh ruihhlo chi hrang hrang laka fihlim, faina kawngah pawh uluk taka invawn a tul tur thu te sawiin hemi kawngah hian chak taka hmalak nise an ti a ni.

YMA khawmpui vawi 66 na tur atan hian inbuatsaihna ngawrh taka kalpui a ni tawh a. September 3 atang khan pandal sak hnatlang pawh tan a ni tawh nghe nghe a ni.