Aizawl Zarkawt Veng Local Council chuan Chief Minister Pu Lal Thanhawla leh a nau Minister of State Pu Lal Thanzara te vawiin khan Zarkawt Recreation Center ah an chawimawi. Pu Lal Thanhawla hi chawimawina thilpek, thu inziahna Citation Pi Zatluangi’n a hlan a, Pu Lal Thanzara hi chawimawina thilpek, thu inziahna Citation tho Pi Lalrozami’n a hlan thung a ni.

Pu Lal Thanhawla chuan hetiang chawimawina hi phuloa a inhriat thu a sawi a. Heti chunga Zarkawt khawtlang hruaitu leh mipui ten an unaua an chawimawi chu lawmthu a sawi a, an unau tana hriatreng tur a ni a ti. Pu Hawla chuan Mizote hi inchawimawi thiamlo hnam kan ni thin a, tunah chuan khawvel thang chho zelah kan harh ve tan ta chu a lawmawm hle a ni a ti a. Hetiang hun kan thleng hi Pathian kaihhruaina vang leh khawtlang nu leh pa te vang a ni a ti a. Zarkawt veng mipuite chu inlungrual tak an nih thu sawiin, veng pawimawh tak leh khawtlang hruaitute avanga veng dangte entawntlak a ni a ti a. Vawk vulh lohna veng awm chhun anihna te, thlanmual an enkawl dante chhuanawm a tihthu te leh khawvel thang chho zelah khawhar inriahpui thinin khawhar chhungte tana harsatna a siam tak fo zawk thin avanga khawhar riahpui loh tur ti ngam veng an ni chu a lawmawm a ni a ti.

Pu Hawla chuan Zarkawt veng chu veng vannei an ni a ti a. An chhungkua chu veng hmasawnna tura thawh hlawklo tak an ni chunga hetiang veng mipuiin an chawimawi chu Pathian kaihhruaina vang a ni a ti.

Pu Lal Thanzara pawhin thusawiin, a u Lal Thanhawla, Chief Minister chawimawi anih chuan a tawk hle a a hriat thu a sawi a. Phulo chunga hetianga an unaua chawimawi an ni chu a veng mipuite kaihhruaina vang a ni a ti a. Zarkawt mipuite chungah lawmthu a sawi a ni. Zarkawt Recreation Center chu Chief Minister Pu Lal Thanhawla’n a pek chhan anga hmang thei turin hmalak mek anih thu a sawi bawk a, an kal zelna turah Zarkawt mipui ten bang loa tawngtai pui zel turin mipuite chu a sawm nawn a ni.

Pu R.Lazirliana, Home Minister chuan Pu Hawla chanchin a sawiah Pu Lal Thanhawla chu hotu leh hruaitu nih tling, nu leh pa tana mi rintlak, mi rilru tha a ni a ti a. Helai hmun petu Pu Lal Thanhawla chu veng mipui ten hre reng turin a chah a. Zarkawt tlangvalin hetiang hun min thlenpui thei hi a vanneihthlak a, hetiang hun buatsaih a ni chu a buatsaihtute an fakawm hle a ni a ti.

Chawimawina hun hi Pu Lalrengpuia, Local Council Chairman in a kaihruai a, YMA, MHIP leh MUP atangte in thusawi ngaihthlak a ni bawk a. Tlaiah mipui tan ruai buatsaih a ni bawk a ni.