Vawiin chawhma khan ZIDCO Chairman thar Pu Lalthlengliana, Ex-MLA chuan a office a luah a. He hunah hian Supply Minister Pu K.Lalrinliana, MLA Pu Lalrinsanga Ralte, Ex-Minister Pu H.Rammawi leh mi pawimawh dangte an tel a ni.

Pu Lalthlengliana chuan ZIDCO Chairman ni tura ruat a ni chu lawmthu sawiin Pathian chakna ringin mi dangte finchhuahna nen tha taka a mawhphurhna hlenchhuah a tum thu a sawi. ZIDCO Chairman thar chuan ZIDCO hmasawnna atan bul tan tha leh tura dah a ni chu Chief Minister leh sawrkar duhsakna a ni tiin Zoram mipuiten an beisei angin mite tana malsawmna ni turin nasa taka tan lak a tum thu leh thawktu zawng zawngte pawh dawngdah lova taimak chhuah lehzual turin a sawm a. ZIDCO hi ropui taka a lo parchhuah leh na turin hma lak a tum tih a sawi a ni.

Supply Minister Pu K.Lalrinliana pawhin thu sawiin ZIDCO chu Mizoram tan a pawimawh em em a, mi retheite chhawmdawlna kawngah hlawk takin hna a lo thawk tawh thin a, Chairman thar kaihhruaina in ZIDCO hian kawng tinrengah hma a sawn zel ang, a ti.

Zoram Industrial Development Corporation Limited (ZIDCO) hi kum 1978 ah Industry lam hmasawnna khawih tura din a ni a. A enkawl tur hian Mizoram Sawrkarin Chairman leh Board of Directors a ruat thin a.  Lungleiah Branch pakhat a nei mek a ni. A din tirh atangin mi 4961 hnenah loan cheng nuai 4575.85 a pe chhuak tawh a. Loan latute hnen atanga rulhna a hmuh tawh zawng zawng chu cheng nuai 6455.47 a ni. Loan latuten leiba an rulh thatloh avangin tunah hian ZIDCO chuan phurrit nasa tak, loan ba NMDFC leh HUDCO ah te a nei mek a, heng harsatna a tawh avang hian fincancial institution, a bik takin NMDFC-a scheme thar te a lak theihloh phah a ni. ZIDCO ah hian thawktu mi 43 an awm mek a, heng zinga mi pakuate hi Group-A officer an ni.

ZIDCO Chairman thar office luah leh inhlanna programme, Pu Lalrinsanga, MLA kaihhruaiah hian Bawngkawn bialtu Pastor Rev. F.Lalchhuanmawia'n hun serh a hmang a. ZIDCO Managing Director Pu Lalramsanga Sailo, IRS, chuan lawmthu sawina in hun hnung a khar a ni.