Plus 2 a Vocational zirna hnuaia Commercial Garment Designing and Making zirlaite chuan an kutchhuak pholanna hun – Avant Garde 2011 Fashion Show chu Millenium Rooftop ah nizan khan an nei a, Parliamentary Secretary Pu Chawngtinthanga’n khuallian niin a hmanpui a ni. He Show hi SCERT chuan Commercial Garment Designing and Making zirna awmna sikul pahinih – Govt. Zemabawk Higher Secondary School leh Govt. Mamawii Girls’ Higher Secondary School ah zirlai te kutchhuak thawmhnaw design pholan nan an buatsaih a ni.

Pu Chawngtinthanga chuan Vocational zirna ngaihsanna chang hretu zirlai ten vocational zirna kaltlangin eizawnna ngelnghet remchang tha tak tak an neih thei thu a sawi. Heng zirna te hi a tirah chuan Centrally Sponsored Schemes (CSS) anga kalpui a ni a, zirlaiten an hlut em vangin Sorkar chuan a chhunzawn chho zel ta a ni a ti. Vocational zirna tun aia uarna chang leh hlutna chang kan hriat chuan tualchung kut themthiamna thil chi hrang hrang ten ngaihhlut leh ngaihven an hlawh bakah heng thil te hian nasa takin hma an sawn theih a beisei thu Pu Chawngtinthanga chuan a sawi.

He hunah hian SCERT Director Pi Malsawmthangi pawhin thu a sawi a, Nl. Rini Tochhawng chuan hun hi a kaihruia a. Pi Lucy L Sailo, Pi Laldingliani Chawngthu leh Pi Susan R Ralte te chuan zirlaite kutchhuak endikin lawmman dawngtu turte an thlang nghal a ni.

SCERT chuan Vocational Education hi kum 1998 vel khan a tan chho a. Tunah hian Vocational zirna trade hrang hrang 8 chu School 16 a kalpui mek a ni a, zirlai 903 an awm mek bawk a ni.