Vawiin khan Law Commission Chairman Pu R Lalrinawma chuan Sihphir Community Hall-ah zirlai pass thar te chawimawina hun khuallian niin a hmanpui.
Law Commission Chairman chuan zirlai te chu nakin lawka ram leh hnam, khawtlang leh kohhran hruaitu la ni mai tur an nih hriain thahnemngaihna, taimakna leh rinawmna an neih a tul a ni, a ti. Thangthar te vanneihzia sawiin sorkar; khawtlang leh chhungkaw tinin zirlaite hmakhaw ngaiin mahni theihna zawn theuhvah theihtawpin hma an la a, Zorama zirna hmasawnna tur a nih beiseiin sorkarin Education Reforms Commission a din a; neihthinglungkhawnga ram dang pan ngai lovin Central University tha tak te, NIT , IIMC bakah Vety Doctor zirna College of Veterinary Sciences & Animal Husbandry te pawh Mizoram chhung ngeiah a lo awm ta a. Horticulture College pawh session tharah tan mai tur niin Medical College pawh neih thuai tumin sorkarin theihtawp a chhuah mek a ni, Pu R Lalrinawma chuan a ti. Zirlai te chu tihtakzetna nen ram leh chhungkaw tana mi tangkai nih tuma bei fan fan tur leh Mizoram chhunga sorkar hna tlem te chauh thawh tum lova ram chhung hmun dang te leh khawvel hmun hrang hranga thawk thei tura tum puitling tak neia lehkha zir turin a fuih a ni.
Pu R Lalrinawma hian Sihphir YMA Hall chung khuhna tur rangva leina atan cheng 60,000 a pe a ni.
He huna thusawitu dang Sihphir VCP Pu Rohmingliana pawhin zirlai pass thar te hlawhtlinna lawmpuiin kawng thui tak zawh tur an la neih thlira thahnemngai lehzual sauh turin a chah a. Ram, khawtlang, chhungkua leh mimala an mawhphurhna theihnghilh ngailo turin a fuih a ni.
HSLC leh HSSLC pass thar te chawimawina inkhawm, Sihphir Education Cell Chairman Pu C Chhuanawma kaihhruaiah hian zirlai te eizawnna kawnga kaihhruaina Career Guidance hun hman a ni a. Higher &Technical Education Department-a Training and Placement Officer (TPO) leh Examination Officer ni bawk Pu C Lalduhkima’n zirlai ten eizawnna tha an hmuh theih nan leh tum mumal tak nei a, chumi tinzawna lehkha zir dan an thiam theihna turin a zirtir a. He inkhawmah hian kumin HSLC Exam-a sawmna dinhmun hauh pha Lalnunhlua kawmna hun hman a ni bawk.
