Vawiin khan School Education Minister Pu H. Rohluna chuan Vanapa Hall-a HSSLC 2014 exam a zirlai tithate chawimawina hun Mizoram Students’ Union buatsaih chu a hmanpui.

Education Minister chuan MSU in zirlaite an hlawhtlinna lawmpui nan leh, zirlai dangte titang tura chawimawina hun an buatsaih chu lawmawm tiin, zirlai tithate chu an kal zelna turah pawh hlawhtlinna leh duhsakna a hlan nghal a. Zirna in leh hmunhma tha zawk nei tura Sorkarin hma a lak rual hian zirlaite pawhin an zirna kawngah theihtawp chhuaha hmasawn ve zel turin a duhsak thu Minister chuan a sawi a. Thiamna tak tak, ram leh khawtlangin a tangkaipui theih tur zirchhuak turin zirlai kalkhawmte chu a chah bawk.

Minister chuan kumin HSSLC result-a topper zinga mipa ai a hmeichhia an tam zawk chu sawilangin, hmeichhe lamah hmasawnna nasa tak kan hmu chu thil lawmawm a nih rualin, mipa lamah chuan inenfiah a, nasa zawk a tan a ngai thung a ni, a ti.

MSU in chawimawina an hlan hi Art subject-a tithate hnenah ‘Lalziki Award’, Science subject-ah ‘Rev. Zairema Award’ leh Commerce subject-ah ‘A.Sawihlira Award’ tiin hming phuahin, vawiin khan zirlai 10 (stream tinah pakhatna atanga pathumna zel) hnenah an sem a ni.